ސީރިއާގައި ދިގު ވެރިކަމެއް ކުރަމުން އައި ބައްޝާރު އަލް-އަސަދުގެ ވެރިކަން ވެއްޓުމުން، ދަނޑިވަޅުގެ ބޭނުން ހިފައި ސީރިއާގެ ބިންތަކަށް ވެރިވެގަތުމަށް ޔަހޫދީން ހިންގަމުން އަންނަ އުދުވާނުތައް ފުޅާކޮށް ޔަރުމޫކް ސަރަހައްދާ ހަމައަށް ޔަހޫދީ ސިފައިން ޖެހިފައިވާކަމަށް މީޑިއާ ރިޕޯޓުތައް ބުނެފިއެވެ.

އަރަބި ބިންތަކަށް ގަދަ ބާރުން ވެރިވެގަންނަން މަސައްކަތްކުރާ ޣައިރު ގާނުނީ އިސްރާއީލުން ސީރިއާގެ ބިމުން ހިފާފައިވާ ގޯލާނުގެ އުސް ބިންތަކުގައި ޔަހޫދީ އާބާދީ ވަޒަވެރިކުރަން މިފަހުންވަނީ ނިންމާފައެވެ.

Ad by Hajj Corporation

ބައްޝާރުގެ ވެރިކަން ވައްޓާލިފަހުން ޔަހޫދީންވަނީ ސީރިއާގެ 435 އަކަ ކިލޯމީޓަރުގެ ސަރަހައްދެއް އިސްތިއުމާރުކޮށްފައެވެ.

ގޯލާންގެ އުސް ބިންތަކުގައި ތިބި ޔަހޫދީންގެ އަދަދު ދެ ގުނައަށް އިތުރުކުރާނެ ކަމަށް ބުނީ ޔަހޫދީ ބޮޑުވަޒީރު ބެންޖަމިން ނަތަންޔާހޫއެވެ. ސީރިއާގައި ދިގު ވެރިކަމެއް ކުރަމުން އައި ބައްޝާރު އަލް-އަސަދުގެ ވެރިކަން ވެއްޓުމުން، ދަނޑިވަޅުގެ ބޭނުން ހިފައި ސޫރިޔާގެ ހާލަތު ގަޑުބަޑުކުރުމަށް ޔަހޫދީ ޣައިރު ގާނޫނީ ދައުލަތުން ވަނީ މަސައްކަތް ފަށައިފައެވެ.

އެގޮތުން ޖަބަލް އަލް-ޝައިޚުގެ ހިސާބުތަކަށް ވެސް ވަނީ ޔަހޫދީން އަރައިގެންފައެވެ. މި ބިމަށްވެސް ޔަހޫދީން އަތް ގަދަކޮށްފައިވަނީ ފަލަސްތީނުގެ ބިމަށް އަތްގަދަކުރަން މިހާރު ގެންގުޅެމުންދާ އުސޫލުގެ ތެރެއިންނެވެ. މި ބިންތަކުގައި ޔަހުދީންގެ 31،000އަށް ވުރެ ގިނަ މީހުން މިހާރުވެސް ދިރިއުޅެއެވެ. އަދި މި ސަރަހައްދުގައި ދިރުއުޅޭ ސީރިޔާއަށް ނިސްބަތްވާ އަލް-މުވައްޙިދުންގެ 24،000އަށް ވުރެ ގިނަ މީހުން ވެސް ދިރިއުޅެއެވެ. 

ޔަރުމޫކް ސަރަހައްދުގައި ފަލަސްތީނުގެ ރެފިއުޖީންވެސް ގިނަ އަދަދަކަށް ދިރިއުޅެއެވެ.

ގޯލާންގެ އުސް ބިންތައް ހިމެނޭ ސަރަހައްދަކީ ޔަރުމޫކް ކޯރުގެ އައްސޭރިފަށުގެ ސަރަހައްދުން ފެށިގެން ގަލީލި ކަނޑާ ހަމައަށް އޮންނަ ސަރަހައްދެވެ.