ބިންވެރިޔާ ސްކީމުގެ ދަށުން ދޫކުރި ގޯތިތަކެއް ނުލިބޭ ބަޔަކު ހުށަހެޅި ފޯޖުކޮށްފައިވާ ކަމަށް ތުހުމަތު ކުރެވޭ ލިޔެކިޔުންތަކަކީ މިދިޔަ ސަރުކާރުން ދިން ލިޔެކިޔުންތައް ކަމުގައި ފުލުހުން ސުވާލުކުރި ފަރާތްތަކުން ބުނެފިއެވެ.

ފުލުހުން އެފަދައިން ބުނީ، ބިންވެރިޔާ ސްކީމުން ގޯތިތައް ލިބުނު މީހުންގެ ލިސްޓުގައި ނުހިމެނޭ، އެހެން ނަމަވެސް ބިންވެރިޔާގެ ގޯއްޗެއް ލިބުނުކަމަށް ބުނާ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލު ރަޝީދުގެ ލިޔުމެއް ސޯޝަލް މީޑިޔާގައި ދައުރުވުމާ ގުޅިގެން ފުލުހުން ބަލަމުންދާ މައްސަލައިގެ މައުލޫމާތު ދިނުމަށް މިރޭ ބޭއްވި ނޫސްވެރިންގެ ބައްދަލުވުމުގައެވެ.

އެ މައުލޫމާތު ދެއްވަމުން އެސިސްޓެންޓް ޕޮލިސް ކޮމިޝަނަރު އަބްދުﷲ ޝަރީފް ވިދާޅުވި ގޮތުގައި އެ މައްސަލައިގައި ފުލުހުން ތަހުގީގު ކުރަން ފެށީ، ފޯޖުކޮށްފައިވާ ކަމަށް ޝައްކުކުރެވޭ ލިޔުން ދީފައިވާ ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުޙައްމަދު ފަޒީލު ރަޝީދުއަށް ދީފައިވާ ލިޔުމަކީ ސައްޚަ ލިޔުމެއްތޯ ކަށަވަރުކުރުމުގެ މަސައްކަތެވެ.

އެގޮތުން އެ މައްސަލައިގައި ފަޒީލުއާ ސުވާލުކުރުމުން، އެ ލިޔުން ދީފައިވަނީ ކުރީގެ ސަރުކާރުންކަން އެނގިފައިވާ ކަމަށާއި، އެ ލިޔުން ދީފައިވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީންއާ ފަޒީލު ބައްދަލުކުރެއްވުމަށް ފަހުގައި ކަން ވެސް ފަޒީލުގެ ފަރާތުން ތަހުގީގަށް އެނގިފައިވާ ކަމަށް ވެސް އޭސީޕީ ޝަރީފު ވިދާޅުވިއެވެ.

ފަޒީލް އަކީ ގޯއްޗަށް ކުރިމަތިލެއްވި ފަރާތެއް. މި ފާހަގަކުރަނީ ފަޒީލް ދެއްވި މައުލޫމާތު. ފަޒީލް އަކީ ގޯއްޗަށް ކުރިމަތި ލެއްވި ފަރާތެއް، ޝަރުތު ހަމަނުވާތީ އޭނާ ލިސްޓުން ވަކިވެފައިއިންކަމަށް، އެ ޝަކުވާ ހިފައިގެން ބައްދަލުމިކުރަނީ އަކްރަމްއާ. އަކްރަމްއާ ބައްދަލުކޮށްފައި އެ ޝަކުވާ ހުށަހެޅީ. އެ ބޭނުމުގައި ފަޒީލް އަކްރަމްއާ ބައްދަލުކުރިކަމަށް ފަޒީލު މައުލޫމާތު ދެއްވަނީ، - އެސިސްޓެންޓް ޕޮލިސް ކޮމިޝަނަރު އަބްދުﷲ ޝަރީފް

އެއަށް ފަހު، އޭސީޕީ ވަނީ ފަޒީލުގެ ފަރާތުން ފުލުހުންނަށް ލިބުނު ލިޔެކިޔުންތަކަކީ ގޯތީގެ ރަޖިސްޓްރީ އާއި ބަންޑާރަ ގޯތި ދޫކުރުމުގެ އެއްބަސްވުން ކަމުގައި ފާހަގަކުރައްވާފައެވެ.

މީގެ އިތުރުން ވެސް، ބިންވެރިޔާ ސްކީމުގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލައިގެ ތެރެއިން ހުޅުމާލޭގެ ތިން ލޮޓެއްގައި މައްސަލަ ހުރި ކަން ފާހަގަވެފައިވާކަން ވެސް އޭސީޕީ ޝަރީފު ވިދާޅުވިއެވެ.

އެގޮތުން ބައެއް ލޮޓުތަކަށް އެއް ފަރާތަށް ވުރެ ގިނަ ފަރާތުން ލިޔުން ހުށަހަޅާފައިވާއިރު، އެ ފަރާތްތަަކަކީ ބިންވެރިޔާގެ ސްކީމުގެ ދަށުން ގޯތި ލިބުމުގެ ޝަރުތު ފުރިހަމަ ނުވާ، އަދި ސްކީމުގައި ބައިވެރިވެފައި ވެސް ނުވާ ބައެއް ކަމުގައި ވެސް އޭސީޕީ ވިދާޅުވިއެވެ.

އެގޮތުން ފަޒީލް އާ އެއްގޮތަށް، ގޯތި ނުލިބުމުން އޭރުގެ ހައުސިން މިނިސްޓްރީގެ އިސްވެރިންނާ ބައްދަލުކުރުމުން ފަހުން އެ ގޯތި ހަމަޖެހިފައިވާ ކަމުގެ ލިޔުން އެ ފަރާތްތަކަށް ދީފައިވާ ކަމުގައި ވެސް ތަހުގީގުގެ ބޭނުމަށް އެ ފަރާތްތަކާ ސުވާލުކުރުމުން އެނގިފައިވާ ކަމުގައި ވެސް އޭސީޕީ ވިދާޅުވިއެވެ.

މިރޭ ފުލުހުން ނޫސްވެރިންގެ ބައްދަލުވުމެއް ބާއްވައިފައިވާއިރު، ގޯތީގެ މައްސަލަ ފެންމަތިވުމާއެކު އެމްޑަބްލިއުއެސްސީގެ ޑީއެމްޑީކަމުން ފަޒީލް ވަނީ ވަގުތީ ގޮތުން ސަސްޕެންޑްކޮށްފައެވެ. އަދި އެޗްޑީސީގެ ޗެއާމަން ފިޔަވައި، އެމްޑީ ފަޒުލް ހިމެނިވަޑައިގަންނަވާހެން މުޅި ބޯޑު ވެސް ވަނީ ސަސްޕެންޑްކޮށްފައެވެ.

އެ މައްސަލައިގައި ފުލުހުން ޖިނާއީ ތަހުގީގެއް ފަށާފައިވަނީ އިއްޔެ ވަގުތެއްގައެވެ.