އިނގިރޭސި ލީގުކަޕްގައި ރޭގައި ކުޅުނު ފޯރިގަދަ މެޗުގައި މެންޗެސްޓަރ ޔުނައިޓެޑުގެ މައްޗަށް ޓޮޓްނަމް ކުރިހޯދައިފިއެވެ. ޓޮޓްނަމް ދަނޑުގައި ކުޅެވުނު މިމެޗު އެޓީމުން ކާމިޔާބުކުރީ 4-3 އިންނެވެ.

މެޗުގެ ބޮޑުބައެއް ޔުނައިޓެޑު ކޮންޓްރޯލްކޮށްގެން ކުޅުނުނަމަވެސް ގޯލުޖަހާނެ މާގިނަ ފުރުސަތުތަކެއް މެޗުގެ ކުރީކޮޅުގައި ތަނަވަސް ނުކުރެވުމުގެ ފައިދާ ޓޮޓްނަމްއިން ވަނީ ނަގާފައެވެ. އެގޮތުން މެޗު ފެށިގެން 15 ވަނަ މިނެޓުތެރޭގައި ޓޮޓްނަމްގެ ފޯވާޑް ސޮލަންކޭ ވަނީ ގޯލެއް ޖަހައިފައެވެ. އަދި ދެވަނަ ހާފުގެ ފުރަތަމަ މިނެޓުގައިވެސް ޓޮޓްނަމްގެ ކުލުސެވްސްކީ ވަނީ ގޯލެއް ޖަހައި ލީޑު ފުޅާކޮށްދީފައެވެ. އަދި އޭގެ 10 މިނެޓުފަހުން ސޮލަންކޭ ވަނީ އިތުރު ގޯލެއްޖަހައި 3 ގޯލުގެ ލީޑެއް ނަގާފައެވެ.

ޔުނައިޓެޑު ގެ ކުޅުންތެރިންނަށް ގޯލުޖަހާނެ ފުރުސަތުތައް ތަނަވަސް ނުކުރެވުމުން، އެ ފުރުސަތުތައް ތަނަވަސް ކޮށްދިނީ ޓޮޓްނަމްގެ ކީޕަރެވެ. އެގޮތުން ޔުނައިޓެޑުން މެޗުގެ 63 ވަނަ މިނެޓާއި 70 ވަނަ މިނެޓުގައި ޖެހި ދެގޯލަކީ ޓޮޓްނަމްގެ ކީޕަރަށް ހެދުނު ގޯސްތަކުން ޖަހާފައިވާ ގޯލުތަކެކެވެ. އަދި ޔުނައިޓެޑުން އިތުރު ގޯލެއް ނުޖެހި އުޅެނިކޮށް، ޓޮޓްނަމް ގެ ފޯވާޑް ސޮން ނެގި ކޯނަރެއް، ޔުނައިޓެޑުގެ ކީޕަރު ދިފާއުކުރަން އުޅެނިކޮށް ޓޮޓްނަމްގެ ބަރެވާލް ވަނީ ކީޕަރުގެ އަތުގެ ޖަހައި އެ ބޯޅަ ގޯލަށް ވަންނަން ފުރުސަތު ދީފައެވެ. ނަމަވެސް މެޗުގެ ރެފްރީވަނީ ގޯލުގައި ވީއޭއާރު ބަލަން ދެކޮޅުހަދައި ޓޮޓްނަމްގެ ގޯލެއްކަމުގައި ނިންމާފައެވެ.

ޔުނައިޓެޑުން ވަނީ ހިތްވަރުދޫނުކޮށް މެޗުގެ އިތުރު ވަގުތުގައި ގޯލެއް ޖަހައި މެޗުގެ ފަރަގު ކުޑަކޮށްފައެވެ.

ލީގުކަޕުގެ ސެމީގައި އާރސެނަލް އާއި ބައްދަލުކުރާނީ ނިއުކާސަލް އެވެ. އަދި ޓޮޓްނަމް އާއި ވާދަކުރާނީ ލިވަރޕޫލާއި ދެކޮޅަށެވެ. މިމެޗުތައް ކުޅޭނީ ޖަނަވަރީ މަހުގެ ފުރަތަމަ ހަފްތާގައެވެ.