ޕަބްލިކް ސަރވިސް މީޑިއާގެ މެނޭޖިން ޑިރެކްޓަރ ކަމުގެ މަގާމަށް އިބްރާހީމް ނަސްރީން އަދި ފެނަކަ ކޯޕަރޭޝަން ލިމިޓެޑްގެ މެނޭޖިން ޑިރެކްޓަރ ކަމުގެ މަގާމަށް މޭޖަރ (ރިޓަޔަރޑް) މުޙައްމަދު ނަޖާޙް އައްޔަނުކުރައްވައިފިއެވެ.

މީގެ އިތުރުން ޕީއެސް.އެމްގެ ޑިރެކްޓަރުންގެ ބޯޑުގެ މެންބަރުކަމަށާއި ޗެއަރޕަރސަން ކަމުގެ މަޤާމަށް މ.ހަނީކޯމްބް، އާމިނަތު ނަމްޒާވެސް މިއަދު ވަނީ އައްޔަނުކޮށްފައެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ބުނީ ޕަބްލިކް ސަރވިސް މީޑިއާގެ ޑިރެކްޓަރުންގެ ބޯޑުގެ މެންބަރުކަމަށާއި މެނޭޖިންގ ޑިރެކްޓަރ ކަމުގެ މަޤާމަށް ލ.އިސްދޫ، މާގަސްދޮށުގެ އަލްފާޟިލް އިބްރާހީމް ނަސްރީން މިއަދު ވަނީ އައްޔަންކޮށްފައިކަމަށެވެ.

މީގެ އިތުރުން ފެނަކަ ކޯޕަރޭޝަން ލިމިޓެޑްގެ ޑިރެކްޓަރުންގެ ބޯޑުގެ މެންބަރުކަމަށާއި މެނޭޖިންގ ޑިރެކްޓަރ ކަމުގެ މަޤާމަށް ހ.ޔެލޯރޯޒް 2، މޭޖަރ (ރިޓަޔަރޑް) މުޙައްމަދު ނަޖާޙް މިއަދު ވަނީ އައްޔަންކޮށްފައިކަމަށެވެ.

ޕީއެސްއެމްގެ މެނޭޖިން ޑިރެކްޓަރުކަމުގެ މަގާމު ހުސްވީ އެމަގާމުގައި ކުރިން ހުންނެވި މުހައްމަދު ސައީދު އިސްތިއުފާދެއްވުމާ ގުޅިގެންނެވެ.

އަދި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުގެ މަގާމުން މުޢާޒް މުޙައްމަދު ރަޝީދު މިއަދު ވަނީ އިސްތިއުފާ ދެއްވައިފައެވެ.

ނަމްޒާ އެ މަގާމަށް އައްޔަނު ކުރެއްވިއިރު ހުންނެވީ ލޯކަލް ގަވަމަންޓް މިނިސްޓްރީގެ ޑެޕިއުޓީ މިނިސްޓަރަކަށެވެ.