ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްކަމަށް މުހައްމަދު އަނަސް އައްޔަނުކުރަން ފެންނަ ކަމަށް ރައްޔިތުންގެ މަޖިލީހުން ފާސްކޮށްފިއެވެ.

ޕީސީބީގެ ރައީސްގެ މަގާމަށް އަނަސް އައްޔަނުކުރައްވައިފައި ވަނީ، މިދިޔަ މަހުގެ 13 ވަނަ ދުވަހުއެވެ. މި މަގާމަށް ބޭފުޅުން އައްޔަނުކުރައްވަނީ ރައީސުލްޖުމްހޫރިއްޔާއެވެ.

Ad by Hajj Corporation

އަނަސް އެ މަގާމަށް އައްޔަނުކުރުމަށް މިއަދުގެ މަޖިލީހުގައި ނެގި ވޯޓުގައި، 82 މެންބަރުން ވަނީ އަނަސްއަށް ރުހުންދޭން ފެންނަކަމަށް ވޯޓު ދެއްވާފައެވެ. އޭނާއަށް ރުހުން ދިނުމާ ދެކޮޅަށް އެއްވެސް މެންބަރަކު ވޯޓު ދެއްވާފައެއް ނުވެއެވެ.

އެ މަގާމަށް އަނަސް އައްޔަނުކޮށްފައި ވަނީ، ކުރިން އެ މަގާމުގައި ހުންނެވި ހަމްދީ އަގީލް ވަކިކުރެއްވުމުންނެވެ.

ދިވެހިރާއްޖޭގެ ޤައުމީ ޔުނިވާސިޓީން މާސްޓާސް އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާ މުހައްމަދު އަނަސް އަކީ، ފިނޭންސް އެންޑް ޕްލޭނިން މިނިސްޓްރީގެ ނައިބުގެ މަގާމު އަދާކުރައްވާފައިވާ ބޭފުޅެކެވެ. އަދި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އޮޑިޓް މެނޭޖަރުކަމާއި މޯލްޑިވްސް ބިޒްނަސް ސްކޫލުގެ އެސޯސިއޭޓް ޕްރޮފެސާކަމުގެ މަގާމު ވެސް އޭނާ ވަނީ އަދާކޮށްފައެވެ.