ކޮމިޝަނާ އޮފް ޕޮލިސް އަލީ ޝުޖާއުއާއި ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)ގެ އާ މެނޭޖިން ޑިރެކްޓަރު މައުރޫފް ޖަމީލް ބައްދަލުކުރައްވައިފިއެވެ.

މިއީ މީގެ ދެ ދުވަސް ކުރިން އެ މަގާމާ ހަވާލުވެވަޑައިގަތުމަށްފަހު މައުރޫފް ޖަމީލްގެ އެންމެ އެއް ބައްދަލުވުމެވެ.

ފުލުހުންގެ މައި އިދާރާގައި ބޭއްވި މި ބައްދަލުވުމުގައި އެޗްޑީސީގެ ޗެއާމަން އަހުމަދު ނާސިފް ވެސް ބައިވެރިވެވަޑައިގަތެވެ. ސީޕީ ޝުޖާއުގެ އަރިިހުގައި ދެ ޑެޕިއުޓީ ކޮމިޝަނަރުން ކަމަށް ފަރުހާދު ފިކުރީ އާއި އިސްމާއިލް ނަވީން އަދި މިހާރު ކުރިއަށް ގެންދާ އެޗްޑީސީގެ އެކިއެކި މައްސަލަތަކުގެ ތަހުގީގުގައި އެންމެ އިސްކޮށް ހަރަކާތްތެރިވެވަޑައިގަންނަވާ އެސިސްޓެންޓް ކޮމިޝަނަރު އަބްދުﷲ ޝަރީފް ބައިވެރިވެވަޑައިގަތެވެ.

ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ހުޅުމާލެ ހިއްކަން ފެށި ހިސާބުން ފެށިގެން ހުޅުމާލެ ތަރައްގީ ކުރުމުގައި އެންމެ އިސްކޮށް އުޅުއްވި ބޭފުޅުންގެ ތެރޭގައި ހިމެނިވަޑައިގަންނަވާ މައުރޫފް އެޗްޑީސީގެ އެމްޑީ ކަމަށް އައްުޔަން ކުރެއްވީ އެ ކުންފުނީގެ ބައެއް ކަންކަން މިސްރާބުން ގޯސްވެ، ކޮރަޕްޝަންގެ ތުހުމަތު އެޅިފައިވާ ދަނޑިވަޅެއްގަ އެވެ.

އެގޮތުން މާލޭގެ ރަށްވެހިންނަށް ބޯހިޔާވެހިކަން ދިނުމަށް ކުރިއަށްގެންދާ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ވަގު ލިޔުންތަކެއް ތައްޔާރުކޮށް ގޯތިތަކެއް ދިން ކަމަށް ތުހުމަތުކުރެވޭ މައްސަލައެއް މިފަހުން ވަނީ ފެންމަތިވެފައެވެ.

މި މައްސަލައިގައި އެންމެ ބޮޑު ތުހުމަތެއް ކުރަނީ އެ ކުންފުނީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ. މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދުފަޒީލް ރަޝީދު ހިމެނެއެވެ. އެހެން ނަމަވެސް އެ ތުހުމަތުތަކަށް ފަޒުލް ވަނީ ދެކޮޅު ހައްދަވާފައެވެ.

މި މައްސަލައާ ގުޅިގެން އެޗްޑީސީގެ ގިނަ މުއައްޒަފުންތަކެއް ސަސްޕެންޑް ކޮށްފައި ވާއިރު ފަޒުލް ވަނީ މަގާމުން އިސްތިއުފާ ދެއްވާފައެެވެ. އޭނާ މަގާމުން އިސްތިއުފާ ދެއްވީ ތަހުގީގަށް ފުރުސަތު ދިނުމަށް ކަމަށް ބުނެއެވެ. އެޗްޑީސީގެ މެނޭޖިން ޑިރެކްޓަރުގެ މަގާމަށް މައުރޫފް ޖަމީލް އައްޔަންކުރެއްވީ އޭގެ ފަހުންނެވެ.

މައުރޫފް ޖަމީލާ ގުޅޭގޮތުން ރައީސް ޑރ. މުހައްމަދު މުޢިއްޒު ވިދާޅުވީ އެއީ އެމަނިކުފާނު ފުރިހަމައަށް އިތުބާރު ކުރައްވާ ބޭފުޅެއް ކަމަށެވެ.