މާލޭގެ ކާރޫބާރު ބޮޑު މަގުތަކުގައި ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ނެގުމުގެ މަސައްކަތުގެ ދަށުން ގިނަ ޢަދަދެއްގެ އުޅަނދުތަކެއް ޓޯކޮށްފިއެވެ.

މާލެގެ ކާރޫބާރޫ ބޮޑުވާ މަގުތަކުގައި ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ނެގުމުގެ ޚާއްޞަ އޮޕަރޭޝަނެއް ފުލުހުން ވަނީ ބުރާސްފަތި ދުވަހު ފަށްޓަވާފައެވެ.

ދިވެހި ފުލުހުންގެ ޚިދުމަތުން މަޢުލޫމާތު ދެއްވާފައިވާ ގޮތުގައި، ޤާނޫނާ ޚިލާފަށް ޕާކުކޮށްފައިވާ އުޅަނދުފަހަރު ޓޯވ ކުރުމުގެ މަސައްކަތް ފަށާފައިވަނީ މާލޭގެ މައިގަނޑު މަގުތަކާއި މުހިންމު ސަރަޙައްދުތަކުންނެވެ. މީގެ ތެރޭގައި ބޮޑުތަކުރުފާނު މަގު، އަމީނީ މަގު، މަޖީދީ މަގު، އޯކިޑް މަގު، އަމީރު އަޙްމަދު މަގު އަދި ސޯސަން މަގުގެ އިތުރުން، އައިޖީއެމްއެޗް އަދި ވިލިނގިލި ފެރީ ޓާމިނަލް ސަރަޙައްދު ހިމެނެއެވެ.މި މަސައްކަތުގެ ދަށުން ޓޯވ ކުރެވެމުންދަނީ ދަތުރުފަތުރަށާއި އާންމު ދަތުރުފަތުރުގެ ނިޒާމަށް ހުރަސްއެޅޭ ގޮތަށް ޤާނޫނާ ޚިލާފަށް ޕާކުކޮށްފައިވާ އުޅަނދުފަހަރެވެ. ފުލުހުން މަޢުލޫމާތު ދެއްވާފައިވާ ގޮތުގައި، މިހާތަނަށް ޓޯވ ކުރެވިފައިވަނީ 150 އުޅަނދެވެ. އަދި މި އުޅަނދުތަކަކީ މުޅިންވެސް ދުއްވާ ސައިކަލުތަކެވެ.ފުލުހުންގެ ފަރާތުން އިތުރަށް މަޢުލޫމާތު ދެއްވާފައިވާ ގޮތުގައި، ޓޯވ ކުރެވޭ އުޅަނދުތައް އަނބުރާ ގެންދިއުމަށް ވެރިފަރާތަށް 7 ދުވަހުގެ މުއްދަތަށެވެ. އަދި ދެ މަސްދުވަހުގެ ތެރޭގައި އެ އުޅަނދުތައް ނުގެންގޮސްފިނަމަ، އެ އުޅަނދުތަކުގެ ރަޖިސްޓްރޭޝަން ބާޠިލުކުރުމަށް ދަތުރުފަތުރާބެހޭ ވުޒާރާއަށް ހުށަހެޅޭނެއެވެ. މީގެ އިތުރުން، ރަޖިސްޓްރޭޝަން ބާޠިލުކުރެވޭ އުޅަނދުތައް ނައްތާލުމުގެ މަސައްކަތްވެސް ކުރިއަށްދާނެ ކަމަށް ފުލުހުން ވިދާޅުވެފައިވެއެވެ.މާލޭގެ މައިގަނޑު މަގުތަކުގެ ދެފަރާތުގައި ޤާނޫނާ ޚިލާފަށް ގިނަ އަދަދެއްގެ އުޅަނދުފަހަރު ޕާކުކޮށްފައި ހުރުމުގެ ސަބަބުން ފައިމަގުން ހިނގާ މީހުންނާއި މަގު ބޭނުންކުރާ އެހެނިހެން ފަރާތްތަކަށް ދަތިތަކާ ކުރިމަތިވަމުންދެއެވެ.