އާރްޑީސީގެ ފައިސާއަށް ޚިޔާނަތްތެރިވި މައްސަލައިގައި އެ ކުންފުނީގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ދިރިއުޅުއްވާ ގޭގެ އިތުރުން، އިތުރު ގެތަކަކަށް ފުލުހުން ވަދެއްޖެއެވެ.

އެގޮތުން ފުލުހުން އެގެތަކަށް ވަނީ މިރޭ ދޭއްޖެހިއިރު، ކޯޓު އަމުރެއްގެ ދަށުންނެވެ.

ފުލުހުންގެ އެ އޮޕަރޭޝަނާ ގުޅިގެން ފުލުހުން މިރޭ ބުނީ، އާރްޑީސީގެ ފައިސާއަށް ޚިޔާނަތްތެރިވެފައިވާ މައްސަލައިގައި އެކަމުގައި އިސްކޮށް އުޅުނުކަމަށް ތުހުމަތުކުރެވޭ މޫސާ އަލި މަނިކު (މޫކޭ) ދިރިއުޅޭ ގ. ދިލްކަށި ގޭގެ 8 ވަނަ ފަންގިފިލާގެ އެޕާޓްމެންޓު އޭގެ އިތުުރުން، މޫކޭގެ އަންހެނުން ދިރިއުޅޭ އެކެއްބީ ވިނަރެސް ޓަވަރުގެ 12 ވަނަ ފަންގިފިލާގެ ހަވަނަ އެޕާޓްމެންޓަށް ފުލުހުން ވަދެފައިވާ ކަމަށެވެ.

އަދި އޭގެ އިތުރުން، މޫކޭ އާއެކު އެކަމުގައި ބައިވެރިވެފައިވާ ކަމަށް ތުހުމަތުކުރެވޭ އެ ކުންފުނީގެ ކުރީގެ ސީއެފްއޯ ކަމުގައިވާ ޔާސިރު ހަސަން ދިރިއުޅޭ ޕޮލްކޯ ފްލެޓަށް ވެސް ވަދެ، ބަލައި ފާސްކޮށްފައިވާ ކަމަށް ފުލުހުން ބުންޏެވެ.

އެ އޮޕަރޭޝަނުގައި ބަލައި ފާސްކުރުމަށްފަހު އެ ގެތަކުން ފުލުހުން ވަނީ އިލެކްޓްރޯނިކް ސާމާނުތަކެއް ގެންގޮސްފައެވެ.