ބޮންޑެޑް ވެއާހައުސް ދެން ހިންގޭނީ ހަމައެކަނި "ކަސްޓަމްސް ގެ ފުލް ކޮންޓްރޯލް" އޮންނަ ސަރަހައްދުތަކުގައި އެކަނި ކަމަށް މިނިސްޓަރ އޮފް ހޯމްްލޭންޑް ސެކިއުރިޓީ އެންޑް ޓެކްނޮލޮޖީ, އަލީ އިހްސާން ވިދާޅުވެއްޖެއެވެ.

މިނިސްޓަރ މިހެން ވިދާޅުވީ އެކްސް ގައި މިއަދު ކުރެއވި ޕޯސްޓެއްގައެވެ.

ޒަމާންތަކެއް ވަންދެން "ބޮންޑެޑް ވެއާހައުސް" ތައް މާލޭގެ އެކި ގެތަކުގައާއި އެޕާރޓްމެންޓް ތަކުގައި ހިންގަމުން އައިކަމަށާއި އަދި އެ ތަންތަނުގައި 2 ތަޅު ހަރުކޮށް އެ ތަޅުގެ ތަޅުދަނޑިތައް ބަލަހައްޓަނީ ކަސްޓަމްސްއިން ކަމަށެވެ.

އަދި ރިޕޯޓް ކުރެވިފައިވާ "ބޮންޑެޑް ވެއާހައުސް" އަކީ ވެސް މި ގޮތަށް ގެ އެއްގައި ހަދާފައި ހުރި ތަނެއް ކަމަށެވެ. ނަމަވެސް ވެރި ފަރާތުން ވެއާހައުސް ހިންގި ތަން ދޫކޮށް އެތަނުގެ އެހެން މަސައްކަތެއް ކުރަމުން އަންނަ ކަމުގެ މައުލޫމާތު ކަސްޓަމްސް އަށް ލިބުމުން އެކަން ޔަގީންކޮށް އެ ފަރާތަށް ވަނީ ވެއާހައުސް ގައި ހުރި ކަމަށް ކަސްޓަމްސް ގެ ރެކޯޑް ތަކުން ދައްކާ މުދަލަށް ޑިއުޓީ ދެއްކުމަށް އަންގާފައެވެ. އަދި މި ކަން ހިންގި ގޮތް ބަލާ ގާނޫނީ ފިޔަވަޅު އެޅުމަށް ކަސްޓަމްސް އާއި ފުލުހުން މި ކަން ތަހުގީގު ކުރަމުން ދާ ކަމުގައި ވެސްް މިނިސްޓަރ ވަނީ ވިދާޅުވެފައެވެ.

މި ގޮތަށް ގެ ތަކުގައި ބޮންޑެޑް ވެއާހައުސްތައް ހިންގުމަކީ ސަލަމަތީ ގޮތުން އަދި ކޮންޓްރޯލް ކުރުމަށް އެންމެ ރަނގަޅު ގޮތް ކަމަށް ނުފެންނާތީ އަދުގެ ސަރުކާރުން ވަނީ ބޮންޑެޑް ވެއާހައުސް ދެން ހިންގޭނީ ހަމަ އެކަނި "ކަސްޓަމްސް ގެ ފުލް ކޮނަޓްރޯލް" އޮންނަ ސަރަހައްދުތަކުގަ އެކަނި ކަމަށް ކަނޑައަޅައި އެ ސިޔާސަތު ތަންފީޒު ކުރަން ފަަށާފައި ކަމަށް މިނިސްޓަރ ވަނީ ވިދާޅުވެެފައެވެ.