އެމްޑީޕީގެ ސަރުކާރުގައި އާރުޑީސީގެ މެނޭޖިން ޑިރެކްޓަރުގެ މަގާމު ފުރުއްވި މޫސާ އަލިމަނިކު (މޫކޭ) އާއި އެ ކުންފުނީގެ އޭރުގެ ޗީފް ފައިނޭންޝަލް އޮފިސަރު (ސީއެފްއޯ) ޔާސިރު ހަސަންގެ ޕާސްޕޯޓް ހިފަހައްޓައި، ފުރުން މަނާކޮށްފި އެވެ.

ފުލުހުން ބުނީ ފުލުހުން ތަހުގީގުކުރަމުންދާ މައްސަލައަކާއި ގުޅިގެން މޫކޭ އާއި ޔާސިރު ފުރުން މަނާކުރުމުގެ އަމުރެއް ހޯދައި، ފުރުން މަނާކޮށް އެކަން އެ ދެބޭފުޅުންނަށް އަންގާފައިވާ ކަމަށެވެ.

އެމްޑީޕީގެ ސަރުކާރުގެ ދުވަސްވަރު އާރުޑީސީގެ ތެރޭގައި ހިންގި ކަމަށް ބުނާ ހިޔާނާތުގެ މައްސަލަތަކުގެ ތަހުގީގަށް ބުރާސްފަތި ދުވަހުގެ ރޭ ފުލުހުން ވަނީ މޫކޭ އާއި ޔާސިރާއި ގުޅުން ހުރި ތިން ތަނެއް ބަލައި ފާސްކޮށްފައެވެ.

މި ތަންތަނުން އިލެކްޓްރޯނިކް ސާމާނުތަކެއް ވަނީ ސީޒްކޮށްފައިވާކަމަށް ވެސް ފުލުހުން ވަނީ މައުލޫމާތު ދީފައެވެ.

އާރްޑީސީގެ މިހާރުގެ މެނޭޖުމަންޓުން ބުނިގޮތުގައި މި ސަރުކާރުން ކުންފުންޏާ ހަވާލުވީއިރު އެ ކުންފުނީގެ ދަރަނި 837 މިލިއަން ރުފިޔާއަށް އަރައެވެ. އަދި ދެ އަހަރުގެ މުއްދަތުގައި އެއްވެސް ޓްރާންސެކްޝަން ސްލިޕެއް ނެތި އެކި ފަރާތްތަކަށް 161 މިލިއަން ރުފިޔާ ދޫކޮށްފައިވާ ކަމަށް ވެސް އެ ކުންފުނިން ބުންޏެވެ.