ފްރާންސްގެ ފުޓްބޯޅަ ކުލަބު ކެއަންގެ އައު ވެރިފަރާތް ކައިލިއަން މްބާޕޭއަށް އެ ކުލަބުގެ ސަޕޯޓަރުން ފާޑުކިޔަން ފަށައިފިއެވެ. ސަޕޯޓަރުން ފާޑުކިޔަން ފެށީ ކުލަބުގެ މެނޭޖަރު ނިކޮލާސް ސޫބް ވަޒީފާއިން ވަކިކުރުމާ ގުޅިގެންނެވެ.

ހުކުރު ދުވަހު ކުޅުނު ލީގު 2 ގެ މެޗެއްގައި ކެއަން އާއި ކްލަރމޯންޓް ފޫޓް ބައްދަލުކުރިއިރު، ސަޕޯޓަރުން ވަނީ އެމްބާއްޕޭގެ ނިންމުމާ ދެކޮޅަށް ބެނަރތަކެއް ދައްކާފައެވެ. މެޗު ފެށުމުގެ ކުރިން މަލްހާބް ނޯމަންޑީ ކޮޕްގެ ފަރާތުން ދެއްކި ފުރަތަމަ ބެނަރގައި ލިޔެފައިވަނީ "މިތާނގައި ކުރާ މަސައްކަތާއި ވަފާތެރިކަމުން އެކަނި ލެޖެންޑުން އުފެދެނީ" މިހެންނެވެ. އަދި އެހެން ދެ ބެނަރުގައި ލިޔެފައިވަނީ "ބައިނަލްއަޤްވާމީ ފެންވަރުގައި އުފާވެރިކަން ހޯދަން އުޅުމުގެ ކުރިން، މިތާނގެ ނަމޫނާ މީހުންނަށް އިޙްތިރާމްކުރޭ" އަދި " އެމްބާއްޕޭ، އެސްއެމްސީ އަކީ ކަލޭގެ ކުޅޭ އެއްޗެއް ނޫން" މިހެންނެވެ.

އެމްބާއްޕޭ ވަނީ ޖުލައި 31 ވަނަ ދުވަހު އޭނާގެ ކުންފުނި އިންޓަރކަނެކްޓެޑް ވެންޗަރސް މެދުވެރިކޮށް ކޯލިޝަން ކެޕިޓަލް އިން ކެއަންގެ ގިނަ ހިއްސާ ގަނެ، ކުއްލި ގޮތަކަށް ކުލަބުގެ ކޮންޓްރޯލް ހޯދާފައެވެ. ފްރާންސްގެ ކެޕްޓަން އެމްބާއްޕޭ ވަނީ އަމިއްލަ ފައިސާއިން 15 މިލިއަން ޔޫރޯ (12 މިލިއަން ޕައުންޑު/16 މިލިއަން ޑޮލަރު) ކުލަބަށް އިންވެސްޓްކޮށްފައެވެ.

ކުލަބުގެ ހިންގުން ބަދަލުވުމަށްފަހު ކެއަންގެ ފެންވަރު ދަށްވެ، މިހާރު އޮތީ ލީގު 2 ގައި 16 ވަނަ ގައެވެ.