މޫސުމަށް އަންނަ ބަދަލުތަކުގެ ސަބަބުން ރާއްޖެއަށް އިއްޔެ ފެނުނު ފަދަ މަންޒަރުތައް އަދިވެސް ފެންނާނެކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. ރައީސް ނަޝީދު އެފަދައިން ވިދާޅުވީ މިއަދު އެކްސްގައި ކުރެވި ޕޯސްޓެއްގައެވެ.

އެ ޕޯސްޓުގައި ރައީސް ނަޝީދު ވިދާޅުވީ ރާއްޖެއަށް މިހާރު ކުރަމުންދާ ވިއްސާރައަކީ ދުނިޔެ ހޫނުވެ، މޫސުމަށް އަންނަ ބަދަލުތަކުގެ ސަބަބުން ކުރަމުންދާ ވިއްސާރައެއް ކަމަށާއި، ދުނިޔެ ހޫނުކުރާ ނަމަ މިފަދަ ކަންކަން ގިނަގިނައިން ފެންނާނެ ކަމަށެވެ.

Ad by Hajj Corporation

އަދި ރާއްޖެއަކީ ދުނިޔެ ހޫނުކުރުމާއި، މޫސުމަށް އަންނަ ބަދަލުތަކުގައި ހިއްސާއެއްވާ ގައުމަކަށް ނުވާއިރު، ރާއްޖެއިން މޫސުމީ ބަދަލުތަކުގެ އަގު އަދާކުރަން ޖެހުމަކީ ބޭއިންސާފެއް ކަމުގައި ވެސް ނަޝީދު ވިދާޅުވިއެވެ.

އަދި އެކަމުގެ ސަބަބުން އެތައް ފޫނުބެއްދޭ ވަރުގެ ގެއްލުންތައް ކުރިމަތިވަމުންދާ ކަމަށާއި އެކަމަށް ބޮޑެތި ހަރަދުތަކެއް ކުރަންޖެހޭނެ ކަމަށް ވެސް ނަޝީދު އެ ޕޯސްޓުގައި ވިދާޅުވިއެވެ.

އިއްޔެ ރާއްޖެއަށް ކުރި ވިއްސާރައިގައި، ގިނަ ރަށެއްގައި ވަނީ ފެންބޮޑުވެ، އާންމު ދިރިއުޅުމަށް ދަތިވެފައެވެ. އެގޮތުން ރާއްޖޭގެ ބައެއް ރަށްތަށް ފެންބޮޑުވުމުގެ ސަބަަބުން ހަ ރަށެއްގައިވެސް ސިފައިން ވަނީ ހަރަކާތްތެރިވެފައެވެ. މީގެއިތުރުން މި ވިއްސާރައިގެ ސަބަބުން މުޅި މާލޭގައި ވަރަށް ބޮޑަށް ވަނީ ފެންހެދިފައެވެ.