ފަތުރުވެރިން ދަތުރުކުރަމުންދާ ޕެސެންޖަރ ލައިނެއް މާލޭގެ ސަރަހައްދުގައި ބަނދަރުތަކުރާތީ، މާލޭގެ ބައެއް ބަނދަރުތަކާއި ދިމާލުން ޓްރެފިކް ބާރުބޮޑުވާނެކަމަށް ފުލުހުން ބުނެފިއެވެ.

މިއަދާއި މާދަމައިގައި، މާލޭގެ 1 ނަންބަރު ޖެޓީ އާއި 2 ނަންބަރު ޖެޓީގައި މި ޕެސެންޖަރ ލައިނުން ގިނަ އަދަދެއްގެ ފަތުރުވެރިން އަރާ ފޭބުމަށް ވަނީ ޖަމަޖެހިފައެވެ.

Ad by Hajj Corporation

އެހެންކަމުން ފުލުހުން އިލްތިމާސް ކޮށްފައިވަނީ، އެ ސަރަހައްދުން ދަތުރުކުރައްވާ ފަރާތްތަކުން މިކަމަށް ހާއްސަ ސަމާލުކަން ދެއްވައި، އެ ހިސާބުގައި ހަރަކާތްތެރިވާ ފުލުހުން ދެއްވާ އިރުޝާދާ އެއްގޮތްވާގޮތުގެ މަތިން އަމަލުކުރެއްވުމަށެވެ. މި ސަރަހައްދަކީ އާންމުކޮަށްވެސް ޓްރެފިކް ފްލޯ ގޯސް ހިސާބެކެވެ.

އާ އަހަރާއި ދިމާކޮށްވެސް ދެ ކްރޫޒްލައިން ވަނީ މާލޭގައި ބަނދަރުކޮށްފައެވެ. އެގޮތުން މި ދެ ކްރޫޒްލައިނުން ވަރަށް ގިނަ ޓޫރިސްޓުން ވަނީ އެކްސްކާޝަންތަކަށް މާލެ އައިސްފައެވެ. ރާއްޖޭގެ ޓޫރިޒަމްގެ ޕީކް ސީޒަނާ އެކު، މި ދުވަސްވަރު ވައިގެ މަގުން ވެސް ރާއްޖެއަށް ގިނަ އަދަދެއްގެ ޓޫރިސްޓުން އަންނަނީ ޒިޔާރަތްކުރަމުންނެވެ.