ސްކޫލުތަކާއި އޮފީސް ގަޑިތަކުގައި ބަރު އުޅަނދުތަކާއި މުދާ އުފުލާ އުޅަނދުތަކަށް ސްކޫލުތަކާއި އޮފީސްތަކުގެ ވަށައިގެންވާ މަގުތަކުން ދަތުރުކުރެވޭނެ ވަކި ވަގުތުތަކެއް ވަރަށް އަވަހަށް ކަނޑައަޅާނެ ކަމަށް ޓްރާންސްޕޯޓް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ސައީދު މިހެން ވިދާޅުވީ ވަޒީރުންގެ އަހާ ފޯރަމުގައި އުމުރުން 9 އަހަރުގެ ޔޫސުފް ކިޔާ ކުއްޖަކު ކުރި ސުވާލެއްގެ ޖަވާބުގައެވެ. އެ ކުއްޖާގެ ސުވާލުގައި މައިގަނޑު ގޮތެއްގައި އެދިފައިވަނީ އޭނާ ސްކޫލަށްދާއިރު މުދާ އުފުލާ އުޅަނދުތަކުގެ ފަހަތުގައި ތާށިވެ، ގަދަ ހޫނުގައި އިންނަންޖެހުމުން ކުރިމަތިވާ އުނދަގޫތަކާ ގުޅިގެން  އުޅަނދުތަކުން މުދާ އުފުލުމަށް ވަކި ވަގުތެއް ކަނޑައަޅައިދިނުމަށެވެ.

Ad by Hajj Corporation

ސުވާލުގައި ޖަވާބުގައި މިނިސްޓަރު ސައީދު ވިދާޅުވީ މާލެ ކަހަލަ ކުޑަ ރަށެއްގައި މިފަދަ ނިންމުމެއް ސަރުކާރަކުން ނިންމާއިރު ވަރަށް ބޮޑެތި އުދަނގޫތައް ހުންނާނެ ކަމަށެވެ. އެކަމަކު އެއީ ގިނަ ބަޔަކަށް ފަސޭހަވާނެ ގޮތަށް ބަލައިގެން ނިންމަންޖެހޭ ކަމަކަށްވާތީ އެކަމުގައި ވަރަށް އަވަހަށް ގޮތްތަކެއް ނިންމާނެ ކަމުގައި ވިދާޅުވި އެވެ.

"އަޅުގަނޑުމެން އެތައް ފަހަރަކު ބިޒްނަސް ކައުންސިލްގައިވެސް މިމަޝްވަރާތައް ކޮށްފިން. އެހެންނަމަވެސް އެންމެން އެއްބަސްވާ ހައްލެއް ނާދޭ. ދެން މިޖެހެނީ އެހެންވިޔަސް އަޅުގަނޑުމެން އެކަމެއް ކުރަން،" ސައީދު ވިދާޅުވި އެވެ.

މާލޭގައި މުދާ އުފުލާ ގަޑިތަކެއް ކަނޑައެޅުމަށްޓަކައި ވިޔަފާރިވެރިންނާއެކު ގިނަ ބައްދަލުވުންތަކެއް ބޭއްވުނުއިރު ހުރިހާ ވިޔަފާރިވެރިން އެއްބަސްވާ ހައްލެއް އަދި ހޯދިފައި ނުވާ ކަން ވަޒީރު ސައީދު ވަނީ ފާހަގަކުރައްވާފައެވެ. އެގޮތަށް ދިމާވަނީ ވިޔަފާރިވެރިންވެސް އަވަހަށް މުދާ ގެންދަންޖެހޭއިރު އެފަދަ ހާލަތްތަކުގައި މުދާ ލިބުން ލަސްވެ ލިބޭ ގެއްލުންތަކާއި ޝަކުވާތައް ހުންނާތީ ކަމަށް ވިދާޅުވި އެވެ.

މުދާ އުފުލާ އުޅަނދުތަކުގެ ސަބަބުން ސްކޫލުތަކަށް ދާ ދަރިވަރުންނާއި އޮފީސްތަކަށް ދާ މީހުންނަށް ވަރަށް ބޮޑެތި ތަކްލީފްތައް އުފުލަންޖެހޭ ކަމަށް ގަބޫލުކުރައްވާ ކަމަށްވެސް ސައީދު ވިދާޅުވި އެވެ. މިފަދަ މައްސަލަތައް ހައްލުކުރުމަށްޓަކައި މާލޭގައި ދުއްވޭނެ އުޅަނދުތަކުގެ އަދަދެއް ކަނޑައަޅަންޖެހޭ ކަންވެސް މިނިސްޓަރު ފާހަގަކުރެއްވި އެވެ. އަދި މާލޭގެ މަގުތައް އަލުން ތަރުތީބުކޮށް، އެންމެން ގުޅިގެން ނޫނީ މަގުމަތީގެ މިފަދަ މައްސަލަތައް ހައްލުކުރުމަކީ ފަސޭހަ ކަމެއް ނޫން ކަމަށްވެސް ސައީދު ވިދާޅުވި އެވެ.

"އަޅުގަނޑު ދޭން ބޭނުންވާ ޔަގީންކަމަކީ ޔޫސުފަށް ވަރަށް އަވަހަށް އަޅުގަނޑުމެން އެ ޕޮލިސީ ތަންފީޒުކުރާނެކަން،" ސައީދު ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ސްކޫލުތަކާއި އޮފީސް ގަޑިތަކުގައި ބަރު އުޅަނދުތަކާއި މުދާ އުފުލާ އުޅަނދުތަކުން މުދާ އުފުލާނެ ގަޑިތަކެއް ކަނޑައެޅި އެވެ. އޭރު ސްކޫލުތަކާއި އޮފީސްތަކަށް ދާ މީހުންނަށް ލުއިތަކެއް ލިބުނު ނަމަވެސް ވިޔަފާރިވެރިންވެސް އޭރުވެސް ވަރަށް ބޮޑަށް އެކަމުގައި ސަރުކާރުގައި ޝަކުވާ އުފުލިއެވެ.