ރާއްޖޭގެ ވިޔަފާރިއާއި އިޤްތިޞާދީ ތަރައްޤީއާ އެންމެ ބޮޑަށް ގުޅިފައިވާ އެއް މަޝްރޫޢަކީ މާލޭ ވިޔަފާރި ބަނދަރުގެ ޙާލަތު ބަދަލުކޮށް، އެތަން ޒަމާނީކުރުން ކަމަށާއި، މި ބަދަލު ގެނައުމުގެ ޢަމަލީ މަސައްކަތްޕުޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ޙިކުމަތްތެރިކަމާއެކު ކުރައްވަމުން ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.

ތިލަފުށީގައި ތަރައްގީކުރުމުގެ މަސައްކަތްފަށާފައިވާ ޕޯޓްގެ ވީޑިއޯއެއް ސޯޝަލް މީޑިއާގައި ހިއްސާ ކުރަށްވަމުން މިނިސްޓަރު ފާހަގަކުރެއްވި ގޮތުގައި، އަދުގެ އިޤްތިޞާދީ ޙަޤީޤަތްތަކާ ފައިހަމަކޮށް، ވިޔަފާރީގެ ކާރުބާރު ހަލުވިކޮށް ފަސޭހަކޮށްދިނުމުގެ ޚިޔާލު ކަމާބެހޭ އިދާރާތަކުން ކުރަމުން އަންނަތާ އެތައް އަހަރެއް ވެއްޖެއެވެ. ނަމަވެސް، އެތައް ޒަމާނެއް ވެގެން ދިޔައިރުވެސް ރާއްޖޭގެ މައި ވިޔަފާރި ބަނދަރު އޮތީ އެންމެ ފުރަތަމަ މާލޭގައި ޤާއިމްކުރި މިންވަރަށް ކަމަށާއި، ގެނެވިފައި ވަނީ ވަރަށް ކުދިކުދި ތަރައްޤީތަކެއް ކަމަށް މިނިސްޓަރު ވިދާޅުވިއެވެ.

Ad by Hajj Corporation

ނަމަވެސް، މި ޙާލަތު ބަދަލުކުރެއްވުމަށް އިސްނަންގަވައި، އެކަމުގެ ޢަމަލީ މަސައްކަތްޕުޅު ފައްޓަވައި، ޤައުމުގައި ހުރި މިފަދަ އެތައް ބޮޑެތި މައްސަލަތަކެއް ޙައްލުކުރެއްވުމުގައި ރައީސް ޑރ. މުޙައްމަދު މުޢިއްޒު މަސައްކަތްޕުޅު ކުރައްވަމުން ގެންދަވާކަން މިނިސްޓަރު ފާހަގަކުރެއްވިއެވެ.

ދުނިޔޭގެ މަސްރަޙަށް އަންނަ އެކި ބަދަލުތަކާއި އިޤްތިޞާދީ އެތައް ގޮންޖެހުމެއްގެ ތެރޭގައިވެސް، ޤައުމު ނިކަމެތިވެގެން ދާން ދޫކޮށްލައިގެން ތިބެވެން ނެތްކަން ރައީސް ޑރ. މުޙައްމަދު މުޢިއްޒު އެ ގެންދަވަނީ ހިތްވަރާއެކު ސާބިތުކޮށްދެއްވަމުން ކަމަށްވެސް މިނިސްޓަރު ވިދާޅުވިއެވެ.

މީގެއިތުރުން، ވެރިއެއްގެ ޒިންމާއަކީ ހުރަސްތަކާއި އުނދަގޫތަކާ ކުރިމަތިލައްވައި، އިޚްލާޞްތެރި މަސައްކަތްޕުޅެއް ކުރައްވައިގެން އެ ޙާލަތުން ޤައުމު މިންޖުކޮށްދެއްވުންކަން ރައީސުލްޖުމްހޫރިއްޔާ ކަށަވަރުކޮށްދެއްވަމުން ގެންދަވާ ކަމަށްވެސް މިނިސްޓަރު މުޙައްމަދު ސަޢީދު ވިދާޅުވިއެވެ.