ރާއްޖޭގެ ރޭސިން އެސޯސިއޭޝަނުން ރޭސްތައް ބޭއްވުމަށް ހުޅުމާލެއިން ދީފައިވާ ކޮންޓްރޯލް ސަރަޙައްދު އަތުލުމަށް ސަރުކާރުން ނިންމި ނިންމުމުގެ ކަންބޮޑުވުން އެ އެސޯސިއޭޝަނުން ފާޅުކޮށްފިއެވެ.

އެ އެސޯސިއޭޝަނުން އެފަދަ ކަންބޮޑުވުމެއް ފާޅުކޮށްފައިވަނީ ރޭސިން އާއި ޑްރިފްޓިން އަށް ޚާއްސަކޮށް ހުޅުމާލެއިން ދޫކޮށްފައިވާ ކޮންޓްރޯލް ސަރަޙައްދުގެ ހުއްދަ ބާޠިލުކުރުމަށް ރައީސް ޑރ. މުޙައްމަދު މުޢިއްޒު ނިންމެވުމާ ގުޅިގެންނެވެ. އެގޮތުން ރައީސް އެކަން ނިންމެވީ، ނުރައްކާތެރިކޮށް ދުއްވުމުގެ ސަބަބުން ހިނގާ އެކްސިޑެންޓްތައް މަދުކުރުމަށް ސަރުކާރުން އަޅަން ނިންމާފައިވާ ބައެއް ފިޔަވަޅުތައް އިއުލާންކުރައްވަމުންނެވެ.

އެގޮތުން އެކަމަށް އިޝާރަތްކޮށް އެ އެސޯސިއޭޝަނުން"އެކްސް"ގައި ކުރި ޕޯސްޓެއްގައި ބުނީ، އެ އެސޯސިއޭޝަނުން އެ މަސައްކަތްކުރަނީ މަގުމަތީގެ ސަލަމަތާއި ރައްކާތެރިކަން ޕްރޮމޯޓުކުރުމުގެ ތެރެއިންނާއި، ގަވާއިދާ ޚިލާފުވާ ކޮންމެ ކަމަކަށް ޖަވާބުދާރީކުރުވައި، ޒިންމާދާރުކުރުވުމުގެ ސަގާފަތެއްގެ ތެރެއިން ކަމަށެވެ. އެގޮތުން އެ އެސޯސިއޭޝަނުން ބާއްވާ ކޮންޓްރޯލް އިވެންޓުތަކުގައި 300 އަށް ވުރެ ގިނަ އެތްލީޓުން ބައިވެރިވާއިރު، އެފަދަ އެތްލީޓުން ވެސް ރޭސްކުރަނީ ހަރުކަށި ގައިޑްލައިންތަކަށް ބޯލަނބައިގެން ކަމަށް އެ އެސޯސިއޭޝަނުން ބުންޏެވެ.

އެއާއެކު އެ އެސޯސިއޭޝަނުން ބުނީ، ސްޕޯޓްސް ކާރެއްގެ ސަބަބުން ހިނގި ހިތާމަވެރި ހާދިސާއަކުން، ރާއްޖޭގެ ރޭސިން އެތްލީޓުންގެ ކެރިއަރު އަދި ރާއްޖޭގެ ރޭސިންގެ ކުޅިވަރަށް ހުރަހެއް އެޅުމަކީ ބަލައިގަނެވޭނެ ކަމެއްނޫން ކަމަށެވެ.

އެ އެސޯސިއޭޝަނުން ވަނީ، ރާއްޖޭގައި ހަރަކާތްތެރިވާ ރޭސިން އެތްލީޓުންގެ ކެރިއަރަށް ހުރަސް ނޭޅޭ ގޮތުން، މަގުމަތީގެ ރައްކާތެރިކަން ދެމެހެއްޓުމަށް ހުރިހާ އިދާރާތައް ގުޅިގެން މަސައްކަތްކުރުމަށް ގޮވާލާފައެވެ.

ރޭސިން އެސޯސިއޭޝަން އަދި ރާއްޖޭގެ ރޭސިންގެ އާއިލާއިން، އެ ކުޅިވަރަށް ޚާއްސަ ކުރި ކޮންޓްރޯލް ސަރަޙައްދުގެ ހުއްދަ ބާތިލްކުރުމުގެ ކަންބޮޑުވުން ފާޅުކޮށްފައިވާއިރު، މި ފަހަކުން އައިސް ސްޕޯޓްސް ކާރުތަކުގެ ސަބަބުން މާލެ ސަރަޙައްދުގައި ގިނަ އެކްސިޑެންތަކެއް ދަނީ ހިނގަމުންނެވެ. އެގޮތުން ފާއިތުވި އެއް މަހުގެ ތެރޭގައި ސްޕޯޓްސް ދެ ކާރެއް ކޮންޓްރޯލުނުވެ ގޮސް ނުރައްކާތެރި ދެ އެކްސިޑެންޓެއް ހިނގާފައިވެއެވެ. އޭގެ ތެރެއިން ހުޅުމާލެ ދެވަނަ ފިޔަވަހީގެ ވިނަރެސް ފްލެޓްތައް ކައިރީގައި ހިނގި ޙާދިސާގައި، ކާރުން ސައިކަލުގައި ޖެހުނު މީހާގެ ޙާލު އަންނަނީ ރަނގަޅުވަމުންނެވެ. އެހެން ނަމަވެސް މިދިޔަ ހުކުރު ދުވަހުގެ ފަތިހު، ހުޅުމާލެ ސެންޓްރަލް ޕާކު ކައިރީގައި ހިނގި ހާދިސާގައި ކާރުން ސައިކަލުގައި ޖެހި ޒުވާނަކު ވަނީ ނިޔާވެފައެވެ.

އެގޮތުން މަގުމަތީގެ ރައްކާތެރިކަން އިތުރުކުރުމަށް، އިތުރު ހަރުކަށި ފިޔަވަޅުތަކެއް އެޅުމަށް ނިންމާފައިވާކަން ރައީސް އިއުލާންކުރެއްވީ އެ ޙާދިސާއާ ގުޅިގެންނެވެ.