ހުސްވި އޮގަސްޓުމަހު އެކަނި ވެސް 200 އަށް ވުރެ ގިނަ ޓްރެފިކް އެކްސިޑެންޓްގެ ރިޕޯޓު، ދިވެހި ފުލުހުންގެ ޚިދުމަތަށް ހުށަހަޅާފައިވާ ކަމުގައި ފުލުހުންގެ އިދާރާއިން ބުނެފިއެވެ.

ފުލުހުންގެ ތަފާސް ހިސާބުތަކުން ދައްކާ ގޮތުން، ފާއިތުވި އޮގަސްޓުމަހުގައި އެކަނި ވެސް ޓްރެފިކް އެކްސިޑެންޓްގެ 203 މައްސަލައެއް އެ އިދާރާއަށް ރިޕޯޓުކޮށްފައިވާއިރު، އެއީ ދުވާލެއްގެ މައްޗަށް ބަލާއިރު، އެވްރެޖް ގޮތެއްގައި 6 މައްސަލައެވެ. އަދި މުޅި މި އަހަރުގެ ޖުމްލަ މައްސަލަތަކުގެ ގޮތުގައި 1،907 މައްސަލައެއް ހުށަހެޅިފައިވާއިރު، އެ އަދަދަކީ ފާއިތުވި އަހަރުގެ އެ މުއްދަތާ އަޅާބަލާއިރު 430 މައްސަލަ އިތުރު އަދަދެކެވެ.

މުޅި މި އަހަރަށް ބަލާއިރު، އާންމު ގޮތެއްގައި ކޮންމެ މަހެއްގައި ވެސް މަދުވެގެން 200 އަށް ވުރެ ގިނަ ޓްރެފިކް އެކްސިޑެންޓް ރިޕޯޓުކޮށްފައިވެއެވެ. އޭގެ ތެރެއިން މި އަހަރުގެ މިހާތަނަށް އެންމެ ގިނަ ޓްރެފިކް އެކްސިޑެންޓް ހިނގި ކަމަށް ރިޕޯޓުކޮށްފައިވަނީ މި އަހަރުގެ މާރިޗު މަހުގެ ތެރޭގައެވެ.

މި އަހަރުގެ އޮގަސްޓުގެ ކުރިން ޓްރެފިކް އެކްސިޑެންޓްތަކުގެ މައްސަލަތައް ފުލުހުންނަށް ހުށަހެޅުނު ޢަދަދުތައް:

1. ޖެނުއަރީ: 263 އެކްސިޑެންޓް
2. ފެބްރުވަރީ: 267 އެކްސިޑެންޓް
3. މާރިޗު: 301 އެކްސިޑެންޓް
4. އޭޕްރީލް: 221 އެކްސިޑެންޓް
5. މޭއި: 226 އެކްސިޑެންޓް
6. ޖޫން: 215 އެކްސިޑެންޓް
7. ޖުލައި: 210 އެކްސިޑެންޓް

މި ޙާދިސާތަކުގެ ތެރެއިން އެންމެ ގިނަ މައްސަލަތައް ރިޕޯޓުކޮށްފައިވަނީ މާލެ ސަރަޙައްދުތަކުގެ ޕޮލިސް ސްޓޭޝަންތަކަށެވެ. އެގޮތުން މި އަހަރުގެ މިހާތަނަށް ޖުމްލަ މި އަހަރުގެ މިހާތަނަށް މާލެ ސަރަހައްދުގެ ޕޮލިސް ސްޓޭޝަންތަކަށް 1،171 އެކްސިޑެންޓެއް ރިޕޯޓުކޮށްފައިވާ ކަމުގައި ފުލުހުންގެ ހިސާބުތަކުން ދައްކައެވެ.

ޓްރެފިކް އެކްސިޑެންޓްތަކުގެ އިތުރަށް، ޓްރެފިކް ވައޮލޭޝަންތަކުގެ ގޮތުގައި އެންމެ ގިނައިން ފުލުހުންނަށް ރިޕޯޓުކުރަނީ ލައިސެންސާ ގުޅުންހުރި މައްސަލަތަކެވެ. އޭގެ ތެރޭގައި ހިމެނެނީ ލައިސެންސް ނެތި ދުއްވުމާއި އަދި ލައިސެންސް ހިފަހައްޓާފައި އޮންނަ އިރު އުޅަނދު ދުއްވުމުގެ މައްސަލަތަކެވެ. އޭގެ އިތުރަށް އަހަރީ ފީ ނުދެއްކުމާއި، ދުއްވަންޖެހޭ ވަރަށް ވުރެ ބާރަށް ދުއްވުމުގެ މައްސަލަތައް ވެސް ގިނައިން ރިޕޯޓުކުރެވޭ މައްސަލަތަކެވެ.