ޝަރުތު ހަމަނުވާ މީހަކަށް ދީފައި އޮތް ގޯއްޗެއްގައި ވަށާފާރު ރާނާފައި ހުއްޓަސް އެތަނެއް އަތުލާނެކަމަށް ގެދޮރުވެރިކަމާއި އިމާރަތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބް ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މުއްތަލިބު ވިދާޅުވީ، ބިންވެރިޔާ ސްކީމްގެ ދަށުން ބައެއް ފަރާތްތަކަށް ނުހައްގުން ގޯތި ދިން ކަމަށް ބައެއް ފަރާތްތަކުން ތުހުމަތު ކުރެ އެވެ.

އޭގެ އެއް މިސާލެއްގެ ގޮތުގައި ވަޒީރު ފާހަގަކުރެއްވީ ގޯއްޗެއް އޮތް މީހަކަށް ގޯތި ނެތް ކަމަށް ހަދައި ގޯތި ދިން ކަމަށް ބުނެ ދެކެވޭ ވާހަކަތަކެވެ. އިތުރު މިސާލެއްގެ ގޮތުގައި މާލެއަށް އުފަން ނޫން ބަޔަކަށް ގޯތި ދިން ކަމަށް ދެކެވޭ ވާހަކަ ވަޒީރު ވަނީ ފާހަގަކުރަށްވާފައެވެ.

އެފަދަ ތުހުމަތުތައް ބައްލަވާނެކަން ފާހަގަކުރަށްވައި ވަޒީރު ވިދާޅުވީ، ގޯތި ރަޖިސްޓްރީ ދީފައި، ގޯތި ހަވާލުކޮށްފައި އޮތް ކަމުގައި ވިޔަސް އަދި އެ ތަނުގައި ވަށާފާރު ރާނާފައި އޮތް ކަމުގައި ވިޔަސް، ޝަރުތު ހަމަނުވާ މީހަކަށް ބިމެއް ދީފައި އޮތް ކަމުގައިވާނަމަ އެ މީހެއްގެ އަތުން ތަން އަތުލައި އެ ފިޔަވަޅު އަޅުއްވާނެ ކަަމަށެވެ.

ސްކޭމެއްގެ ތެރެއިން ކަމަށް ވިޔަސް، ކޮންމެ އިދާރާއެއް މެދުވެރިކޮށް ކަމަށް ވިޔަސް އޮޅުވާލައިގެން ލިބެން ނުޖެހޭ ފަރާތަކަށް ފުލެޓެއް، ގޯއްޗެއް ދީފައިވާނަމަވެސް ނުވަތަ އިއުލާންކޮށްފައިވާ ލިސްޓުގައި ނުހިމެނޭ ފަރާތަކަށް ދީފައިވާ ނަމަވެސް އެތަނެއް އަތުލަށްވާނެކަމަށް ވަޒީރު ވަނީ ވިދާޅުވެފައެވެ.

ގެދޮރުވެރިޔާގެ ދަށުން ލިބޭ ފުރަތަމަ ފްލެޓް ލިބޭ 4،000 މީހުންގެ ލިސްޓުތައް ރީއިވެލުއޭޓްކޮށް، މި އަންނަ ރޯދަ މަހުގެ ކުރިން އެ ލިސްޓު އާންމުކުރުމަކީ އަމާޒެއް ކަމުގައި ވެސް މިއަދުގެ ނޫސްވެރިންގެ ބައްދަލުވުމުގައި ވަޒީރު ޑރ. މުއްތަލިބު ވަނީ ވިދާޅުވެފައެވެ.