ރާއްޖެއަށް ކުރަމުންދާ ވިއްސާރައިގައި އަނެއްކާވެސް ފ. ނިލަންދޫގައި ފެންބޮޑުވެއެވެ.

މީގެ ދެ ވަރަކަށް ހަފުތާކުރިން ވެހުނު ވާރޭގައި ވެސް ނިލަންދޫގައި ވަނީ ފެން ބޮޑުވެފައެވެ. އެފަހަރު ވަނީ ފެންބޮޑުވުމުގެ ސަަބަބުން ބޮޑެތި ގެއްލުންތަކެއް ވެސް ލިބިފައެވެ.

އެމްއެންޑީއެފުން މިއަދު ބުނީ ފ.ނިލަންދޫއަށް ބޯކޮށް ވާރޭވެހި ފެން ބޮޑުވެގެން އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށެވެ.

މިގޮތުން އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ދަނީ އެރަށުގައި ހަރަކާތްތެރިވަމުން.ކަމަށް އެމްއެންޑީއެފުން ބުންޏެވެ.

ރާއްޖޭގެ އެކި ހިސާބަށް ވިއްސާރަކުރަމުން އަންނައިރު، ރާއްޖެއަށް މޫސުން ވަރަށް ގޯސްވާނެ ކަމަށް ލަފާކޮށްފައި ވާތީ، ވިއްސާރާގައި ލިބިދާނެ ގެއްލުންތަކުން ރައްކާތެރިވާން ފުލުހުންނާއި ސިފައިން އަދި ކަމާ ބެހޭ އެހެން އިދާރާތައް ގުޅިގެން އިއްުޔެ ވަނީ ޖޮއިންޓް އޮޕަރޭޝަނެއް ވެސް ފަށާފައެވެ.

މި މަހުގެ ތިންވަނަ ދުވަހު މާލެއަށް ވަރަށް ބޯކޮށް ވާރޭ ވެހި، ގިނަ މަގުތަކުގައި ފެން ބޮޑުވެ، ގޭގެއަށް ވަރަށް ބޮޑެތި ގެއްލުންތައް ލިބުނެވެ. އެންޑީއެމްއޭ އިން ކުރިން ބުނި ގޮތުގައި، އެ ފަަހަރު ލިބުނު ގެއްލުން 2.2 މިލިއަން ރުފިޔާއަށް އަރަ އެވެ. އަދި އެއީ މިހާތަނަށް ވިއްސާރާގައި މާލެއަށް އެންމެ ގެއްލުން ބޮޑުވި ފަހަރެވެ.