އުމްރާގެ ގަވާއިދާ ހިލާފުވެގެން ޖޫރިމަނާ ކުރި 19 ކުންފުނީގެ ތެރެއިން ޖޫރިމަނާ ދެއްކީ ހަމައެކަނި ތިން ކުންފުނިން ކަމަށް އިސްލާމިކް މިނިސްޓްރީއިން ހާމަ ކޮށްފިއެވެ.

މި ކުންފުނިތައް ޖޫރިމަނާކޮށްފައިވަނީ ޖެނުއަރީ މަހުގެ 14 ވަނަ ދުވަހު އުމްރާގެ ގަވާއިދާ ހިލާފުވުމުންނެވެ. މި ކުންފުނިތަކުގެ ތެރެއިން، ކުންފުންޏަކުން އުމްރާއަށް ހައްޖުވެރިން ފޮނުވާފައިވާ ކަމަށް ބުނެ ދޮގުހަދައި އެފައިސާ ޑޮލަރުގަތުމަށް ބޭނުންކޮށްފައި ވާކަންވެސް ހާމަވެފައިވެއެވެ.

އިސްލާމިކް މިނިސްޓަރ ޑރ. ޝަހީމް އަަލީ ސައީދު ވިދާޅުވެފައިވާ ގޮތުގައި ޖޫރިމަނާ ކުރި 19 ކުންފުނީގެ ތެރެއިން ހަމައެކަނި ޖޫރިމަނާ ފައިސާ ދައްކާފައިވަނި އެންމެ ތިން ކުންފުންޏަކުންނެވެ. ޖޫރިމަނާ ކޮށްފައިވާ ކުންފުނިތަކަށް ޖޫރިމަނާ ދެއްކުމަށް 30 ދުވަހުގެ މުއްދަތެއް ދީފައިވާއިރު، ދީފައިވާ މުއްދަތުގެ ތެރެގައި އަމަލުނުކުރާ ކުންފުނިތަކުގެ ނަން ހާމަ ކުރަށްވާނެކަމަށް މިނިސްޓަރު ވަނީ ވިދާޅުވެފައެވެ.

މި ޖޫރިމަނާ ކޮށްފައިވަނީ މިދިޔަ ޑިސެންބަރު މަހު ފެންމަތިވި އަލް ހިޖްރަ ޓްރެވަލްސް އެންޑް ޓުއާސްއާ ބެހޭ މައްސަލައެއްގެ ތަހުގީގަށް ފަހުގައެވެ. މިކުންފުނިންވަނީ ހައްޖުވެރިން އެނބުރި ރާއްޖެއަށް ގެނައުމުގެ ޓިކެޓް ހަމަޖައްސާފައިނުވާކަމަަށާއި އެފައިސާ އެހެން ބޭނުންތަކަށް ބޭނުން ކޮށްފައިވާކަމަށް އެއްބަސްވެފައެވެ.

އަލް ހިޖްރާ ގްރޫޕް 100،000(އެއް ލައްކަ) ރުފިޔާއިން ޖޫރިމަނާކޮށް، އެ ގްރޫޕުގެ ލައިސަންސް ބާތިލްކޮށް، އެ ގުރޫޕުގައި ބައިވެރިވާ ހިއްސާދާރެއް އޮންނަ އެއްވެސް ކުންފުންޏަކުން ކުރިއަށް އޮތްތާގައި އުމްރާއަށް މީހުން ގެންދިޔުން މަނާ ކުރުމަށް މިނިސްޓްރީ އިންވަނީ ނިންމާފައެވެ.