ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި ހަފުތާގައި ހއ. ދިއްދޫއަށް ކުރަން ނިންމަވާފައިވާ ދަތުރަށް ހުރަސް އެޅޭ ފަދަ އެއްވެސް ކަމެއް ނުކުރަން ދިއްދޫ ކައުންސިލުން އެމްޑީޕީއަށް އަންގައިފިއެވެ.

އިއްޔެ ދިއްދޫ ކައުންސިލުން އެމްޑީޕީގެ އެ ދާއިރާގެ ރައީސް، އަބްދުﷲ ވަހީދުއަށް ފޮނުވި ސިޓީއެއްގައި ބުނީ ދިއްދޫ ރައްޔިތުންނާ ރައީސް ބައްދަލު ކުރެއްވުމަށް ބާއްވާ ޖަލްސާއަށް ދަތިވާ ގޮތަށް ލައުޑް ސްޕީކަރު ކަހަލަ ވަސީލަތްތައް މެދުވެރިކޮށް ނުވަތަ އެނޫންވެސް އެއްވެސް ވަސީލަތެއް މެދުވެރިކޮށް އެއްވެސް ކަމެއް ނުކުރަން އެދޭކަމަށެވެ.

އަދި ސުލްހަވެރި ސިޔާސީ ހަރަކާތްތައް ހިންގި ކަމުގައިވީ ނަމަވެސް ރަށުގެ ސުލްހަމަސަލަސްކަމާއި އަމަންއަމާންކަމަށް ހާއްސަ ސަމާލުކަމެއް ދެއްވާ ގާނޫނީ އިމުން ބޭރު ނުވުމަށް ވެސް ސިޓީގައި ބުނެފައެވެ.

މީގެއިތުރުން ރަށުގެ ސުލްހަ މަސަލަސްކަމާއި އަމަންއަމާންކަމަށް ދޭ އެއްބާރުލުމަށް ވެސް އެ ކައުންސިލުން ވަނީ ޝުކުރު އަދާކޮށްފައެވެ.

ރައީސުލްޖުމްހޫރިޔއްޔާ ދިއްދޫއަށް ވަޑައިގަންނަވަން ނިންމަވާފައި ވަނީ އަންނަ އަންގާރަ ދުވަހު އެވެ.

މިދިޔަ ހަފްތާ ރައީސް ވަނީ މާޅޮސްމަޑުލު އުތުރުބުރީގެ ބައެއް ރަށްތަކަށް ވެސް ދަތުރުކުރައްވާފައެވެ. އެގޮތުން ރައީސުލްޖުމްހޫރިއްޔާގެ މިދަތުރުފުޅުގައި އެއަތޮޅުގެ 11 ރަށަކަށް ޒިޔާރަތްކުރައްވައި، އަތޮޅު ކައުންސިލާއި ރަށު ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، ރަށްރަށުގެ މުއައްސަސާތަކުގެ އިސްވެރިންނާ ބައްދަލުކުރައްވައި، އެރަށްރަށުގެ ތަރައްޤީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރެއްވިއެވެ.