ކުރީގެ ރައީސް އިބްރާހިމް މުހައްމަދު ސޯލިހު ގެ އަނބިކަނބަލުން އަދި ކުރީގެ ފަސްޓް ލޭޑީ، ފަޒްނާ މުހައްމަދު ގެ މަންމާފުޅު ޒަމީރާ ޢުމަރު ނިޔާވުމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

މެޑަމް ފަޒްނާގެ މަންމާފުޅު ނިޔާވެފައިވަނީ މިއަދުގެ ހަވީރުގެ ވަގުތެއްގައެވެ. އެގޮތުން ތައުޒިޔާ ފޮނުއްވަމުން ރައީސް މުޢިއްޒު ވިދާޅުވީ ފަޒްނާ އަޙްމަދުގެ ލޮބުވެތި މަންމާފުޅު އަވަހާރަވުމުގެ ފުން ހިތާމައިގައި ބައިވެރިވެ، ކުރީގެ ރައީސް ޞާލިޙްގެ ދެ ކަނބަލުންނަށާއި ޢާއިލާއަށް ތަޢުޒިޔާ ދަންނަވާކަމަށެވެ.

މީގެ އިތުރުން މަރްޙޫމާ ޒަމީރާއަށް ސުވަރުގޭގެ ދާއިމީ ނިޢުމަތް ދެއްވައި، މާތްﷲގެ ތަނަވަސް ރަޙްމަތާއި އޯގާވަންތަކަމުގައި ތާއަބަދުމެ ލެހެއްޓެވުން އެދި ރައީސް ވަނީ ދުޢާ ދަންނަވާފައެވެ.

މަރްޙޫމާ ޒަމީރާއަކީ ކުރީގެ ރައީސް މުހައްމަދު ނަޝީދުގެ ބޮޑުދައިތާފުޅު ވެސް މެއެވެ. އެކަމަނާ އަވަހާރަވެފައި ވަނީ އާލާސްކަންފުޅާއިގެން އުޅުއްވަނިކޮށް، އައިޖީއެމް ހޮސްޕިޓަލުގައި ފަރުވާދެނިކޮށެވެ.