ފަލަސްޠީނުގެ މިނިވަން ދައުލަތެއް ޤާއިމުކުރުމަށް ސަރުކާރުން އަނެއްކާވެސް ގޮވާލައިފިއެވެ.

ހާރިޖީ ވުޒާރާ އިން ނެރުނު ބަޔާނެއްގައި ވަނީ ބައިނަލްއަޤްވާމީ ޤާނޫނާއި އދ.ގެ ޤަރާރުތަކާ އެއްގޮތްވާ ގޮތުގެމަތިން، 1967 ވަނަ އަހަރުގެ ކުރިން ކަނޑައެޅިފައި އޮތް ސަރަހައްދީ އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްޠީނުގެ ވެރިރަށްކަމުގައި ކަނޑައަޅައި، ފަލަސްޠީނުގެ މިނިވަން ދައުލަތެއް ޤާއިމުކުރުމަށް ދިވެހިރާއްޖެއިން ކުރާ ތާއީދު ތަކުރާރުކޮށް އެކަމަށް ގޮވާލާ ކަމަށެވެ. އަދި އދ.ގައި ފަލަސްތީނަށް ފުރިހަމަ މެމްބަރުކަން ދިނުމަށް ދިވެހިރާއްޖެއިން ތާއީދުކުރާކަން ވެސް ސަރުކާރުން ވަނީ ތަކުރާރުކޮށްފައެވެ.

އަދި ފަލަސްޠީނުގެ ބިންތަކުގައި ބައިނަލްއަޤްވާމީ ޤާނޫނާ ޚިލާފަށް އާބާދީތައް ޤާއިމުކުރުމާއި ފަލަސްޠީނުގެ ބިންތައް ހިފުމާއި ޣައްޒާއިން ފަލަސްޠީނުގެ ރައްޔިތުން ނެރުމަށް ކުރާ އެންމެހާ މަސައްކަތްތައް ދިވެހިރާއްޖެއިން ކުށްވެރިކޮށްފައިވާކަމަށް ވެސް ސަރުކާރުން ވަނީ ބުނެފައެވެ.

މި ބަޔާނުގައި ބައިނަލްއަޤްވާމީ ޤާނޫނުތައް ނެގެހެއްޓުމަށާއި ފަލަސްޠީނުގެ ރައްޔިތުންގެ ޙައްޤުތަށް ކަށަވަރުކޮށްދިނުމަށް އަޅަންޖެހޭ އެންމެހާ ފިޔަވަޅުތައް އެޅުމަށް ބައިނަލްއަޤްވާމީ މުޖުތަމަޢަށް ރާއްޖެއިން ވަނީ ގޮވާލައިފައެވެ. އަދި މި މައްސަލައަށް ދާއިމީ ނިމުމެއް އަންނާނީ ޞުލްޙައިގެ މަޝްވަރާގެ ތެރެއިން މިނިވަން ދެ ދައުލަތް ޤާއިމުކުރެވިގެން ކަމުގައި ވެސް އެ ބަޔާނުގައި ސަރުކާރުން ބުންޏެވެ.

ޚާރިޖީ ވުޒާރާއިން އެފަދަ ބަޔާނެއް ނެރުނުއިރު، އިއްޔެ ރިޔާސީ ބަޔާން އިއްވަމުން ރައީސިލްޖުމްހޫރިއްޔާ ޑރ.މުހައްމަދު މުއިއްޒު ވަނީ ފަލަސްތީނުގެ މުސްލިމުންގެ ހާލަތުގެ މައްްޗަށް އަލިއަޅުވާލައި ވާހަކަފުޅު ދެއްކަވާފައެވެ. އެގޮތުން ޢައްޒާގެ ބިމުން ފަލަސްތީނުގެ ރައްޔިތުން ބޭލުމަށްކުރާ އެއްވެސް މަސައްކަތަކަށް ރާއްޖެއިން ދުވަހަކުވެސް ތާއީދު ނުކުރާނެކަމުގެ ޔަގީންކަން އެމަނިކުފާނު ވަނީ ދެއްވާފައެވެ.