އުރީދޫގެ މި އަހަރުގެ އަހަރީ ޢާންމު ޖަލްސާގައި ހިއްސާއަކަށް 3.43 ރުފިޔާ ދިނުމަށް ހުށަހެޅުމަށް އޫރީދޫގެ ޑިރެކްޓަރުންގެ ބޯޑުން ފާސްކޮށްފިއެވެ.

އުރީދޫގެ އަހަރީ އާންމު ޖަލްސާ ބޭއްވުމަށް ހަމަޖެހިފައިވަނީ މި އަންނަ މަހުގެ ތެރޭގައެވެ. އެ ޖަލްސާ ބާއްވާނެ ތާރީޚެއް އަދި އުރީދޫން ހާމަކޮށްފައެއް ނުވެއެވެ.

Ad by Hajj Corporation

އެގޮތުން އެ ޖަލްސާގައި ހިއްސާއަކަށް 3.43 ރުފިޔާ ދިނުމަށް އުރީދޫގެ ބޯޑުން ހުށަހަޅާފައިވާއިރު، މިދިޔަ އަހަރު އުރީދުން ވަނީ ހިއްސާއަކަށް 3.27 ރުފިޔާ ބަހަން ފާސްކޮށްފައެވެ. އެއީ އޭގެ ކުރީގެ އަހަރުގެ ފައިދާއިން ބަލާއިރު، މުޅި ޖުމްލަ 484 މިލިއަން ރުފިޔާގެ ހިއްސާއެވެ.

އެހެންކަމުން މި އަހަރު ހިއްސާއެއްގެ ގޮތުގައި ދޭ އަދަދަކީ، މިދިޔަ އަހަރު ހިއްސާގެ ގޮތުގައި ދިން އަދަދަށް ވުރެ، 16 ލާރި އިތުރު އަދަދެކެވެ.

އުރީދޫގެ މި ޖަލްސާގައި، މިދިޔަ އަހަރުގެ އޮޑިޓްކޮށްފައިވާ މަލީ ބަޔާންތައް ވެސް ފާސްކުރުން އޮންނާނެއެވެ. އެ ބަޔާންތައް ޑިރެކްޓަރުންގެ ބޯޑުން މިހާރު ފާސްކޮށްފައިވާއިރު، އެ މާލީ ހިސާބުތައް ހިމެނޭ އަހަރީ ރިޕޯޓު މި މަހުގެ 21 ވަނަ ދުވަހު އާންމުކުރަން ވަނީ އެކުންފުނިން ނިންމާފައެވެ.

އުރީދޫގެ މި އަހަރުގެ އަހަރީ އާންމު ޖަލްސާގައި ބައިވެރިވެ، ޑިވިޑެންޑް ލިބޭނީ މި މަހުގެ 18 ވަނަ ދުވަހުގެ މެންދުރު ދޭއް ޖެހުމާ ހަމައަށް ރަޖިސްޓްރީވެފައިވާ މީހުންނަށެވެ. އަދި އެ ޖަލްސާގެ ނޯޓިސް އަދި އެޖެންޑާ، މި މަހުގެ 22 ވަނަ ދުވަސް ނިމުމުގެ ކުރިން އާންމުކުރަން ވެސް އެ ކުންފުނިން ވަނީ ނިންމާފައެވެ.