މިއަދު ހެނދުނު މ.ހައުސް ޕްލާޒާގައި ހިނގި އަލިފާނުގެ ހާދިސާއާ ގުޅިގެން 55 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށް ނޭޝަނަލް ޑިޒާސްޓަރ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭއިން ބުނީ ހައުސް ޕްލާޒާގައި މިއަދު ހިނގި އަލިފާނުގެ ހާދިސާގެ ސަބަބުން ، ދެ ގެއެއްގެ މައި ފެންހޮޅިއަށް ލިބުނު ގެއްލުމާއި ގުޅިގެން އެކަން މަރާމާތުކުރެވެންދެން 2 ގެއަކުން 55 މީހަކަށް ވަގުތީ ބޯހިޔާވަހިކަން ހަމަޖައްސާދެވިފައިވާކަމަށެވެ.

އޭގެ ތެރޭގައި 20 ބިދޭސީން ހިމެނޭކަމަށްވެސް އެންޑީއެމްއޭއިން މައުލޫމާތުދެއެވެ.

އަލިފާން ރޯވެފައިވާކަމުގެ މައުލޫމާތު އެމްއެންޑީއެފްގެ ފަޔަރ އެންޑް ރެސްކިއު ސަރވިސްއަށް ލިބިފައިވަނީ މިއަދު ހެނދުނު 6:35 ހާއިރުކަމަށާއި އަލިފާންގަނޑު ކޮންޓްރޯލްކުރެވިފައިވަނީ 07:47 ހާއިރުކަމަށް އެމްއެންޑީއެފްއިން މައުލޫމާތުދެއެވެ. އެމްއެންޑީއެފްއިން ބުނީ ރޯވީ އެގޭގައި ހުރި ކުނިތަކެއްގައި ކަމަށެވެ.

މިގޭގައި މީގެ ކުރިން ވެސް އަލިފާނުގެ ހާދިސާއެއް ހިނގާފަވެއެވެ. އެފަހަރު ބަޔަކު ރޯކޮށްލީ ކަމަށް ތުހުމަތު ކުރެވުނެވެ.