ކ. ހުރާގައި މީހުން ދިރިއުޅޭ ގެއެއްގައި ރޭ މެންދަމުގެ ވަގުތެއްގައި އަލިފާނުގެ ހާދިސާއެއް ހިނގައި، އެ ގޭގެ ކޮޓަރިއެއް ބޭނުން ނުކުރެވޭ ވަރަށް އަނދައިފިއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނީ، ހުރާގައި މީހުން ދިރިއުޅެމުންދާ ގެއެއްގައި ރޭގެ ވަގުތެއްގައި އަލިފާނުގެ ހާދިސާއެއް ހިނގައި އެ ގޭގެ ބައެއް ބޭނުން ނުކުރެވޭ ވަރަށް އަނދާފައިވާ ކަމުގެ ރިޕޯޓު ލިބިފައިވާ ކަމަށެވެ. މި ހާދިސާގައި ލިބުނު ގެއްލުންތަކުގެ ތަފްސީލު އެ އޮތޯރިޓީން ދަނީ ބަލަމުންނެވެ.

Ad by Hajj Corporation

މި ހާދިސާގައި އެ ގޭގައި ދިރިއުޅޭ މީހަކަށް އަނިޔާވެފައިވާ ކަމަށްވެސް މައުލޫމާތު ލިބެއެވެ. ހުރާ ކައުންސިލާ ހަވާލާދީ އެންޑީއެމްއޭ އިން ބުނީ، މި ހާދިސާގެ ސަބަބުން އެ ގޭގައި ދިރިއުޅޭ މީހެއްގެ އެއް އަތް ފިހިގެން ފަރުވާ ދީފައިވާ ކަމަށެވެ.

ހުރާއިން ''މެންދުރު'' އަށް މައުލޫމާތު ދިން މީހަކު ބުނީ މި ހާދިސާ ހިނގާފައިވަނީ އެ ރަށު "ނޫފަރު" ގޭގައި ކަމަށެވެ. އަދި ހާދިސާ ހިނގީ މެންދަމު 12:30 ހާއިރުކަމަށް ވެސް އޭނާ ބުންޏެވެ.

މިހާދިސާ ހިނގިއިރު އެ ކޮޓަރީގައި ދެ ކުދިން ނިދާފައި ތިބިކަމަށާއި، އެކުދިން ނެރެވުނީ ވަރަށް މަސައްކަތުން ކަމަށް ވެސް އޭނާ ވަނީ މައުލޫމާތުދީފައެވެ. އޭނާ ލަފާކުރާގޮތުގައި ކޮޓަރީގައި ރޯވީ ކަރަންޓް ޝޯޓެއް ވެގެންނެވެ.