ކުރިއަށް އޮތް ރަމަޟާން މަހު އުމްރާގެ އަޅުކަން އަދާކުރުމަށް ސައުދީ އަރަބިއާއަށް ދާ ދިވެހީންގެ ބޭންކް އޮފް މޯލްޑިވްސް (ބީއެމްއެލް) ޑެބިޓް ކާޑު ލިމިޓަށް 1500 ޑޮލަރު އިތުރުކުރުމަށް ބީއެމްއެލް އިން ނިންމައިފި އެވެ.

ބީއެމްއެލް ޑެބިޓް ކާޑު ލިމިޓަށް 1500 ޑޮލަރު އިތުރުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އަންގަވާފައެވެ.

އެކަމާ ގުޅޭގޮތުން ބީއެމްއެލް އިން މިއަދު ބުނީ ކާޑު ލިމިޓު ބޭނުން ކުރެވޭނީ ސައުދީ އަރަބިއްޔާގައި ކަމަށެވެ. އަދި ބީއެމްއެލް އިން ދޫކުރުމަށް ހަމަޖެހިފައިވަނީ އުމްރާއަށް ދާ ކޮންމެ މީހަކަށް އެއްކާޑު ކަމަށެވެ.

މިހާރު ވެސް ޑެބިޓް ކާޑުތަކަށް ދީފައިވާ 250 ޑޮލަރު ލިމިޓްވެސް އުމްރާވެރިންނަށް ލިބޭނެ ކަމަށް ބީއެމްއެލް އިން ބުނެ އެވެ. މިއާއެކު އުމްރާއަށް ދާ ކޮންމެ މީހެއްގެ ޑެބިޓް ކާޑު ޖުމްލަ 1750 ޑޮލަރަށް އިތުރުވާނެ އެވެ. މީގެ އިތުރުން ކޮންމެ ޓިކެޓަކަށް ދޭ 500 ޑޮލަރުވެސް ލިބޭނެ އެވެ. ޑެބިޓް ކާޑަށް އިތުރު ކޮށްދީފައިވާ 1500 ޑޮލަރު ހޯދުމަށް އުމްރާއާށް ގެންދާ ގުރޫޕުތައް މެދުވެރިކޮށް ލިބޭނެ ކަމަށް ބޭންކުން ބުނެ އެވެ.

މީގެ އިތުރުން އަމިއްލައަށް އުމްރާއަށް ދާ ފަރާތްތަކުން ފަސް ދުވަސް ކުރިން ބީއެމްއެލް މޮބައިލް އެޕް މެދުވެރިކޮށް ޕާސްޕޯޓް ކޮޕީ އާއި ޓިކެޓް ކޮޕީ ފޮނުވުމުން ބޭންކުން ކާޑު ލިމިޓް ހަމަޖައްސައިދޭނެ ކަމަށް ބީއެމްއެލް އިން ބުނެ އެވެ.

އުމްރާވެރިންގެ ޑެބިޓް ކާޑު ލިމިޓް 1500 ޑޮލަރަށް އިތުރުކޮށްދިނުމަށް ރައީސް މުއިއްޒު ނިންމެވީ ރޯދަމަހު އުމްރާއަށް ދާ ދިވެހީންނަށް ބޭންކް ރޭޓުގައި ފަސޭހައިން ޑޮލަރު ލިބޭނެ އިންތިޒާމް ހަމަޖައްސައިދިނުމުގެ ގޮތުން ކަމަށް އެމަނިކުފާނު ވަނީ ވިދާޅުވެފަ އެވެ.

އުމްރާއަށް ދާ ދުވަސްވަރު އާންމުގޮތެއްގައި ޑޮލަރުގެ ބާރު ބޮޑުވެއެވެ. އެހެންވެ ރައީސްގެ މި ނިންމެވުމަކީ އުމްރާވެރިންނަށް ލިބިގެންދާނެ ވަރަށް ބޮޑު ފަސޭހައެކެވެ.

ޑޮލަރުގެ އަގު ހަމައަގަށް ތިރިކޮށް، ދިވެހިންނަށް ތިޔާގި ދިރިއުޅުމެއް ހޯދައިދިނުމަށް މި ސަރުކާރުން މުހިންމު ފިޔަވަޅުތަކެއް އަޅާފައިވާއިރު، އެ ރޮނގުން ގިނަ މަސައްކަތްތަކެއް ވެސް ކުރަމުން ދެއެވެ.