އެމެރިކާގެ ރައީސް ޑޮނަލްޑް ޓްރަމްޕް ވަނީ އޯވަލް އޮފީހުގައި ނޫސްވެރިންގެ ކުރިމަތީގައި ޔޫކްރޭންގެ ރައީސް ޒެލެންސްކީއަށް ތަކުރާރުކޮށް ހަޅޭއްލަވާފައެވެ.

ރަޝިޔާގެ ރައީސް ވްލަޑިމިޔަރ ޕުޓިން ކޮޅަށް ބުރަވެވަޑައިގެން ހުންނެވި ޓްރަމްޕާ ގުޅުން އިޢާދަކުރަން ޒެލެންސްކީ އެމެރިކާއަށް ވަޑައިގެން، މިއަދު ވަނީ ވައިޓް ހައުސްގެ އޯވަލް އޮފީހުގައި ޓްރަމްޕާ ބައްދަލުކުރައްވައިފައެވެ.

މި ހާލަތު އިތުރަށް ގޯސްވެގެން ދިޔައީ ޔުކްރެއިންގެ ލީޑަރު، އެމެރިކާގެ ނައިބު ރައީސް ޖޭޑީ ވާންސްގެ "ސުލްހައަށް އޮތް މަގަކީ" ރަޝިއާއާއެކު ޑިޕްލޮމެޓިކް ގުޅުން ބަދަހިކުރުން ކަމަށް ބުނި ބުނުމާމެދު ދެކޮޅު ހެދުމުންނެވެ."މި ހަނގުރާމަ ނިމުމަކަށް ގެނައުމަށް ރައީސް ކުރައްވާ މަސައްކަތަށް ތިބާ ޝުކުރުވެރިވާން ޖެހޭނެ،" ވާންސް ބުންޏެވެ. އަދި އޭނާ އިތުރަށް ބުނި ގޮތުގައި ޔުކްރެއިންގެ ހަނގުރާމައިގެ މަސައްކަތްތަކުގައި ވަރަށް ބޮޑެތި މައްސަލަތަކެއް އެބަހުއްޓެވެ.

އޯވަލް އޮފީހުގައި ޒެލެންސްކީއަށް ހަޅޭއްލަވާލުމަށްފަހު، ސޯޝަލް މީޑިއާގައި ކުރި ޕޯސްޓެއްގައި ޓްރަމްޕް ބުނެފައިވަނީ "މިފަދަ ނުރައްކާތެރި އަދި ޕްރެޝަރުގެ ދަށުގައި ކުރެވޭ މަޝްވަރާއަކުން މެނުވީ ދެނެގަނެވެން ނެތް ވަރަށް ގިނަ ކަންތައްތަކެއް ދެނެގަނެވުނު" ކަމަށެވެ."ޖަޒުބާތުގެ ތެރެއިން ބޭރުވާ ކަންތައްތަކަކީ ހައިރާންވާ ފަދަ ކަންތައްތަކެކެވެ، އަދި އަޅުގަނޑަށް ކަނޑައެޅިގެން އެނގުނީ ރައީސް ޒެލެންސްކީ ސުލްހައަށް ތައްޔާރެއް ނޫންކަން އެމެރިކާ ބައިވެރިވާ ނަމަ، އެއީ އޭނާއަށް ހީވަނީ އެމެރިކާގެ ބައިވެރިވުމުން މަޝްވަރާތަކުގައި އޭނާއަށް ވަރަށް ބޮޑު ފައިދާއެއް ލިބޭނެ ކަމަށް،" ޓްރަމްޕް ވަނީ ބުނެފައެވެ.

ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ މީގެ ތިން އަހަރު ކުރިން، 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހުއެވެ.ހަނގުރާމައިގައި ޔޫކްރެއިނަށް މާލީ ގޮތުންނާއި، ހަތިޔާރާއި އަސްކަރީ ދާއިރާއިން އެންމެ ބޮޑު އެހީތެރިކަމެއް ވެދެމުން ގޮސްފައި ވަނީ އެމެރިކާއިންނެވެ.އެމެރިކާގެ އެހީތެރިކަން ނުލިބޭނަމަ، ރަޝިޔާއާ ދެކޮޅަށް ޔޫކްރެއިނުގެ އަސްކަރިއްޔާއަށް މާގިނަ ދުވަހު ހިފަހައްޓައި ނުލެވޭނެކަމަށް ޒެލެންސްކީ ވެސް ވަނީ ވިދާޅުވެފައެވެ.