މާލެ ސަރަހައްދުގެ މައި ތިން ހޮސްޕިޓަލެއްގެ އައުޓް ޕޭޝެންޓް ޑިޕާޓްމެންޓް (އޯޕީޑީ) ތައް މިއަދު ބަންދުވާނެ ކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖޯއެމްއެޗް) އިން ބުނެފިއެވެ.

އެގޮތުން އައިޖީއެމްއެޗްއިން ބުނެފައި ވަނީ އެ ހޮސްޕިޓަލުގެ އިތުރުން ދަރުމަވަންތަ ހޮސްޕިޓަލް އަދި ވިލިމާލެ ހޮސްޕިޓަލުތަކުގެ އޯޕީޑީ މިއަދު ބަންދުވާނެ ކަމަށެވެ. ނަމަވެސް އޯޕީޑީތަކުގެ ޚިދުމަތް ވަގުތީ ގޮތުން މެދުކަނޑާލައިފައި ވިއަސް، އިން ޕޭޝެންޓް ޑީޕާޓްމެންޓް (އައިއީޕީޑީ) އަދި އިމަޖެންސީ ޚިދުމަތްތައް މެދުނުކެނޑި ކުރިއަށް ދާނެކަމަށް އައިޖީއެމްއެޗްއިން ބުނެއެވެ.

އެހެންކަމުން މާލެ ސަރަހައްދުގެ ބައެއް މައި ހޮސްޕިޓަލްތަކުގެ އޯޕީޑީ ބަންދުކުރަން އައިޖީއެމްއެޗްއިން ނިންމާފައިވަނީ މާލެއަށް ބޯކޮށް ވާރޭވެހި ފެންބޮޑުވެ، މިއަދަކީ ބަންދު ދުވަހެއް ކަމަށް ސަރުކާރުން ނިންމާފައިވާއިރު، ހޮސްޕިޓަލު ސަރަހައްދުތައް ފެންބޮޑުވެފައިވާތީ ބަލި މީހުންނަށް ހޮސްޕިޓަލަށް އައުމާއި އެނބުރި ދިއުމަކީ ތަކުލީފަކަށް ވެދާނެތީ ކަމަށް އެ ހޮސްޕިޓަލުން ބުނެއެވެ. މިއާއެކު އައިޖީއެމްއެޗްގެ މެއިން ގޭޓުން ހުންނަ އައިސާރަނި ހިނގުން ފެންބޮޑުވެފައިވާތީ، އެ ހޮސްޕިޓަލުގެ މެއިން ގޭޓުން އާންމުންނަށް ވަދެ ނިކުތުމަށް ދަތިވާތީ، އިމަޖެންސީ ގޭޓު ބޭނުންކުރެވޭނެ ކަމަށް ވެސް އެ ހޮސްޕިޓަލުން ވަނީ ބުނެފައެވެ.