ރަށު ހުނަރު ދިރުވުން' ސްލޯގަން އާއެކު ރޯދަމަހަށް ހާއްސަކޮށް ތޮއްޑޫގައި ބާއްވާ ރޯދަ ޗެލެންޖުގެ ޗެންޕިއަންކަން އެފްސީ މަޓިމޯ ހޯދައިފިއެވެ. ރާއްޖޭގެ ފުރަތަމަ ޑިވިޝަނުގައިވެސް ގިނަ ތަޖުރިބާތަކެއް ލިބިފައިވާ މާޒިން ގެ އިރުޝާދުގެ ދަށުން ނިކުތް އެފްސީ މަޓިމޯ މުބާރާތް ކާމިޔާބުކޮށްފައިވަނީ ފަސް ނަންބަރު އެފްސީ އާއި ވާދަކޮށް 2-2 އިން އެއްވަރުވެ، ޕެނަލްޓީގައި 6-7 އިން މަޓިމޯ ކުރިހޯދައިގެންނެވެ.
ފައިނަލް މެޗުގައި މަޓިމޯގެ ގޯލުތައް ސިރުޙާން އަދި މާއިލް ކާމިޔާބުކޮށްފައިވާއިރު، ފަސްނަންބަރު އެފްސީގެ ގޯލުތައް ކާމިޔާބުކުރީ މަނާލް އާއި ހައިޒަމްއެވެ.

ރޯދަމަހަށް ހާއްސަކޮށް ކުރިޔަށްގެންދިޔަ މިމުބާރާތުގައި ޖުމްލަ 8 ޓީމަކުން ބައިވެރިވެފައިވާއިރު، މުބާރާތް ކުރިޔަށް ގޮސްފައިވަނީ މާރިޗު މަހުގެ 5 އިން 10 އަށެވެ.
މުބާރާތުގެ އެންމެ މޮޅުކުޅުންތެރިޔަކަށް މަޓިމޯގެ މާޒިން ހޮވިފައިވާއިރު، އެންމެ ގިނަ ގޯލުޖެހީ ފަސްނަންބަރު އެފްސީގެ މަނާލްއެވެ. އެންމެ މޮޅު 6 ކުޅުންތެރިންނަށް ހޮވިފައިވަނީ މާޒިން އާއި މަނާލް އާއި ޝައުޤަތު އާއި ޝިޔާޒް އާއި ހައިޒަމްގެ އިތުރުން ކީޕަރަކަށް އާދަމް ވަހީދުއެވެ.   

Ad by Hajj Corporation

މިމުބާރާތަކީ ރޯދަމަހުގައި ތޮއްޑޫ ރައްޔިތުންގެމެދުގައި އެކުވެރިކަމާއި އެއްބައިވަންތަކަން އާލާކޮށް، އިތުޖިމާއީ ދުޅަހެޔޮކަން އިތުރުކުރުމުގެ މަޤުސަދުގައި ރަށުގެ ޒުވާނުން އިސްނައިގެން ބޭއްވި މުބާރާތެކެވެ. މިއީ މިމުބާރާތުގެ 2 ވަނަ އެޑިޝަންއެވެ.

މިމުބާރާތުގެ މެއިން ސްޕޮންސަރ އަކީ ދަ ހޯކްސް ޕްރައިވެޓް ލިމިޓެޑްއެވެ. އަދި މިމުބާރާތުގެ މީޑިއާ ޕާރޓްނަރަކީ މެންދުރު އޮންލައިންއެވެ.