ފްރެންޗް ލީގް 1 ގައި ރޭގައި ތާވަލުގެ ދެވަނައިގައި އޮތް އޮލިމްޕިކް މާސޭ އާ 3-1 އިން ބަލިކޮށް، ޕީއެސްޖީ ވިދިވިދިގެން 12 ވަނަ ފަހަރަށް ލީގު ނެގުމާއި ގާތާށް ޖެހިލައިފިިއެވެ.

ރޭގެ މޮޅާއެކު،ލީގުގައި މިހާތަނަށް އެއްވެސް މެޗަކުން ބަލިނުވާ ޕީއެސްޖީ ވަނީ 26 މެޗުން 68 ޕޮއިންޓް ހޯދައި، ދެވަނައިގައިވާ މާސޭ އާ ދެމެދު 19 ޕޮއިންޓުގެ ފަރަގެއް ގާއިމުކޮށްފައެވެ. މާސޭ އަށް މިހާތަނަށް ލިބިފައިވަނީ 49 ޕޮއިންޓެވެ.

Ad by Hajj Corporation

ޕާކް ޑޭ ޕްރިންސަސްގައި ކުޅުނު މެޗުގައި ޕީއެސްޖީ އަށް ފުރަތަމަ ލަނޑު ޖެހީ އޮސްމާނޭ ޑެމްބެލޭ އެވެ. ފުރަތަމަ ހާފު ނިމުމުގެ ކުރިން ނޫނޯ މެންޑޭސް ވަނީ އިތުރު ލަނޑެއް ޖަހައި ޕީއެސްޖީގެ ލީޑު ދެ ލަނޑަށް އިތުރުކޮށްފައެވެ.

ދެވަނަ ހާފުގެ ކުރީކޮޅު މާސޭގެ އަމީން ގުއީރީ ވަނީ އެ ޓީމަށް އުއްމީދީ ލަނޑެއް ހޯދައިދީފައެވެ. ނަމަވެސް މާސޭގެ ޕޯލް ލިރޯލާގެ އަތުން ބައިކޮޅަށް ގޯލެއްވަދެ، ޕީއެސްޖީގެ ލީޑު އަލުން ދެ ލަނޑަށް އިތުރުވިއެވެ.

ލީގު ކަށަވަރުކުރުމަށް ޕީއެސްޖީ އަށް ބާކީ އޮތް 8 މެޗުގެ ތެރެއިން ދެ މެޗު ކާމިޔާބުކުރުން ފުދޭނެއެވެ. އެ ޓީމުގެ ކުރިއަށް އޮތް މެޗަކީ މި މަހުގެ 29 ވަނަ ދުވަހު ސެއިންޓް އެޓިއެންއާ ދެކޮޅަށް ރަށުން ބޭރުގައި ކުޅޭ މެޗެވެ.