ޔޫއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ރޭ އަމިއްލަ ދަނޑުގައި ލިވަޕޫލްގެ މައްޗަށް 2-0 ގެ ނަތީޖާއަކުން ކުރިހޯދައި، ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ސެމީ ފައިނަލާ ގާތަށް ޖެހިލައިފިއެވެ. މި މޮޅާއެކު އަންނަ ހަފުތާގައި އެންފީލްޑްގައި ކުޅޭ ދެވަނަ ލެގަށް ޕީއެސްޖީން ދާނީ ބޮޑު އިތުބާރަކާއެކުގައެވެ.

ޕާކް ޑެސް ޕްރިންސަސްގައި ކުޅުނު މި މެޗުގެ ފުރަތަމަ ލަނޑު ޖަހައި ޕީއެސްޖީއަށް ކުރިހޯދައިދިނީ މެޗުގެ 11 ވަނަ މިނެޓުގައި ޑެސިރޭ ޑޫއޭ އެވެ. އޭނާ ފޮނުވާލި ހަމަލާ ލިވަޕޫލްގެ ރަޔަން ގްރެވެންބާކްގެ ފައިގައި ޖެހިފައި ގޮސް އަމާޒުވީ ގޯލުގެ ތެރެއަށެވެ. މެޗުގައި ޕީއެސްޖީން ގިނަ ފުރުސަތުތަކެއް ތަނަވަސްކުރިއިރު، ލިވަޕޫލްގެ ކީޕަރު ގިއޯގީ މަމަރްދަޝްވިލީ ވަނީ ހުށިޔާރުކަމާއެކު ގިނަ ހަމަލާތަކެއް ދިފާއުކޮށްފައެވެ.

Ad by Hajj Corporation

ޕީއެސްޖީގެ ދެވަނަ ލަނޑު މެޗުގެ ދެވަނަ ހާފުގައި ކާމިޔާބުކޮށްދިނީ ހްވިޗާ ކްވަރަޓްސްކޭލިއާ އެވެ. ޖޮއާއޮ ނޭވޭސް ތަނަވަސްކޮށްދިން ފުރުސަތަކުން އޭނާ ވަނީ ކީޕަރު ކައިރިން ނައްޓާލުމަށްފަހު ބޯޅަ ގޯލުގެ ތެރެއަށް ފޮނުވާލާފައެވެ. މީގެ އިތުރުން ޕީއެސްޖީއަށް ޕެނަލްޓީއެއް ލިބުނު ކަމަށް ރެފްރީ ނިންމި ނަމަވެސް، ވީއޭއާރު ބެލުމަށްފަހު އެ ނިންމުން ވަނީ ބަދަލުކޮށްފައެވެ.

މި މެޗުގެ ތަފާސްހިސާބުތަކަށް ބަލާއިރު ޕީއެސްޖީން ވަނީ މުޅި މެޗު ޑޮމިނޭޓްކޮށްފައެވެ. އެގޮތުން އެޓީމުން 18 ހަމަލާ އުފެއްދިއިރު، ލިވަޕޫލަށް މުޅި މެޗުގައި އުފެއްދިފައިވަނީ އެންމެ 3 ހަމަލާއެވެ. އަދި 2020 ވަނަ އަހަރުގެ ފަހުން ޗެމްޕިއަންސް ލީގު މެޗެއްގައި ލިވަޕޫލަށް ގޯލާ އަމާޒުކޮށް އެންމެ ހަމަލާއެއްވެސް ފޮނުވާނުލެވުނު މިއީ ފުރަތަމަ ފަހަރެވެ.

މިއީ ހުރިހާ މުބާރާތެއްގައި ޖެހިޖެހިގެން ލިވަޕޫލް ބަލިވި ތިންވަނަ މެޗެވެ. ތާރީޚީ ގޮތުން ބަލާއިރު، މިއީ 1953-54 ވަނަ އަހަރުގެ ސީޒަނަށްފަހު އެއް ސީޒަނެއްގައި ތިން ފަހަރަށް ޖެހިޖެހިގެން ތިން މެޗުން ލިވަޕޫލް ބަލިވި ފުރަތަމަ ފަހަރެވެ. ލުއިސް އެންރީކޭގެ އިރުޝާދުގެ ދަށުން ކުޅޭ ޕީއެސްޖީން މިހާރު ވަނީ އިނގިރޭސި ކްލަބުތަކާ ދެކޮޅަށް ކުޅުނު ފަހު 10 މެޗުގެ ތެރެއިން 8 މެޗު ކާމިޔާބުކޮށްފައެވެ.