ރައްޔިތުންގެ މަޖިލީހަށް އެއްވެސް ފަރާތެއްގެ ނުފޫޒެއް ނެތްކަމާއި، އިދިކޮޅު ފަރާތްތަކުން ދައްކަމުންދާ ވާހަކަތަކަކީ ދޮގު ވާހަކަތަކެއްކަން މިއަދު ހާމަވެގެންދާނެ ކަމަށް ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާހް ވިދާޅުވެއްޖެއެވެ.

މިއަދު މަޖިލީހުގައި ވާހަކަފުޅު ދައްކަވަމުން ފަލާހް މިހެން ވިދާޅުވީ، ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދުކުރުމަށް ކޯޓުތަކުގެ ގާނޫނަށް މަޖިލީހުން ގެނައި އިސްލާހުގެ ބިލް ރައީސުލްޖުމްހޫރިއްޔާ މުޙައްމަދު މުއިއްޒު އިބްރާހީމް ތަސްދީގު ނުކުރައްވައި އަނބުރާ ފޮނުވާލެއްވުމާ ގުޅިގެންނެވެ.

ފަލާހް ވިދާޅުވި ގޮތުގައި، ސަރުކާރު ހިންގާ ޕީއެންސީގެ ބޮޑު މެޖޯރިޓީ އޮތް ނަމަވެސް، މި މަޖިލީހަކީ ރައީސުލްޖުމްހޫރިއްޔާ އަންގަވާ ކޮންމެ ކަމެއް ފާސްކުރާނެ މަޖިލީހެއް ނޫންކަން ރައްޔިތުންނަށް މިހާރު ވަނީ ހާމަވެފައެވެ.

"އިދިކޮޅު ފަރާތްތަކުން މި ދައްކާ ވާހަކަތަކަށް ވެސް މި ބިލްގެ ސަބަބުން ސާފު ޖަވާބެއް ލިބިއްޖެ. ޕީއެންސީގެ ކިތަންމެ ބޮޑު މެޖޯރިޓީއެއް އޮތަސް އަޅުގަނޑުމެން ފާސްކުރާ ކޮންމެ ފާސްކުރުމެއް ރައީސުލްޖުމްހޫރިއްޔާ ގަބޫލެއް ނުކުރައްވާ ކަން ހާމަވެގެން ގޮސްފި،" ފަލާހް ވިދާޅުވިއެވެ.

އިތުރަށް ވާހަކަ ދައްކަވަމުން ފަލާހް ވިދާޅުވީ، "މި މަޖިލީހަކީ ސަރުކާރުން އަންގާހާ ގޮތަކަށް ރައީސުލްޖުމްހޫރިއްޔާ ވިދާޅުވާހާ ގޮތަކަށް މަސައްކަތް ކުރާ މަޖިލީހެއް ނޫން ކަން ވެސް ރައްޔިތުންނަށް މިއަދު ހާމަވެގެންދާނެ" ކަމަށެވެ.

ރައީސުލްޖުމްހޫރިއްޔާ މި ި ބިލް އަނބުރާ ފޮނުއްވާލެއްވީ، އޭގެ ބައެއް މާއްދާތައް ގާނޫނުއަސާސީއާ ފުށުއަރާ ކަމަށް ބަންޑާރަ ނައިބު އަހުމަދު އުޝާމް ރައީސަށް ލަފާ އެރުވުމާ ގުޅިގެންނެވެ.

މިއަދުގެ މަޖިލިސް ޖަލްސާގައި މި ބިލާ މެދު އަމަލުކުރާނެ ގޮތަކާ މެދު ބަހުސްކުރުމަށްފަހު ބިލު ވަނީ އަނބުރާ ދިރާސާ ކުރުމަށް ޖުޑިޝިއަރީ ކޮމެޓީ އަށް ފޮނުވާލާފައެވެ.