logoEN
ޚަބަރު

ސުޕްރީމް ކޯޓުގެ ފަނޑިޔާރުކަމަށް ޝަހީދު އައްޔަނުކުރަން ފެންނަކަމަށް ކޮމެޓީން ނިންމައިފި

އާމިނަތު ސަފާއާމިނަތު ސަފާ

18 މާރިޗު 2025 - 08:03

ސުޕްރީމް ކޯޓުގެ ފަނޑިޔާރުކަމަށް, ހައި ކޯޓުގެ އިސް ފަނޑިޔާރު ހުސައިން ޝަހީދު އައްޔަނުކުރުމަށް ރައްޔިތުންގެ މަޖިލީހުގެ ޖުޑީޝަރީ ކޮމެޓީން ނިންމައިފިއެވެ.

ޝަހީދު ސުޕްރީމްކޯޓުގެ ފަނޑިޔާރުކަމަށް އައްޔަނުކުރުމަށް ރައީސް މުއިއްޒު ފޮނުއްވާފައިވާ ސިޓީފުޅު މިއަދުގެ ރައްޔިތުންގެ މަޖިލީހުގެ ޖަލްސާގައި ވަނީ އިއްވާފައެވެ. އަދި މި މައްސަލަ ދިރާސާކުރުމަށް ޖުޑީޝަރީ ކޮމެޓީއަށް ވަނީ ފޮނުވާފައެވެ.

ކޮމެޓީގައި މެންބަރުން ދެއްކެވި ވާހަކަފުޅުގައި ފާހަގަކުރައްވާފައިވަނީ މިއީ ޖުޑީޝަލް ސަރވިސް ކޮމިޝަން (ޖޭއެސްސީ)ން އިންޓަވިއުކޮށް ރައީސުލްޖުމްހޫރިއްޔާ ފޮނުވާފައިވާ ނަންފުޅެއް ކަމަށްވާތީ، އިތުރު ދިރާސާއެއް ނުކޮށް ރުހުން ދިނުމަކީ އެންމެ ރަނގަޅުގޮތްކަމަށެވެ.

އެހެންވެ އެއްވެސް އިތުރު ދިރާސާއެއް ނުކޮށް މިނަން ފާސްކުރުމަށް ކޮމެޓީގައި ވަނީ ވޯޓަށް އަހާފައެވެ. ކޮމިޓީއަށް ހާޒިރުވެ ތިއްބެވި މެންބަރުންގެ އިއްތިފާޤުން ނިންމާފައިވަނީ ޝަހީދަށް ރުހުންދޭން ފެންނަކަމަށެވެ.

ހުސައިން ޝަހީދު ސުޕްރީމް ކޯޓުގެ ފަނޑިޔާރުކަމަށް ކުރިމަތިލައްވާފައިވަނީ އެ މަގާމަށް ކުރިމަތިލުމަށް ޖޭއެސްސީ އިން ދެވަނަ ފަހަރަށް ހުޅުވާލުމުންނެވެ.

ޖޭއެސްސީ އިން ސުޕްރީމް ކޯޓުގެ ފަނޑިޔާރުން ހޯދުމަށް އިއުލާނުކޮށްފައިވަނީ އޭސީސީން ބަލަމުން ދިޔަ މައްސަލަތަކަކާ ގުޅިގެން ސުޕްރީމް ކޯޓުގެ ތިން ފަނޑިޔާރަކު ސަސްޕެންޑުކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ނިންމުމާ ގުޅިގެން ފަނޑިޔާރު ހުސްނުއްސުއޫދު މަގާމުން އިސްތިއުފާ ދެއްވުމާ ގުޅިގެންނެވެ.

މި މަގާމަށް ދެވަނަ ފަހަރަށް ޖޭއެސްސީ އިން ހުޅުވާލި ފުރުސަތުގައި ހުސައިން ޝަހީދު ކުރިމަތި ލައްވާފައިވާއިރު މި މަގާމަށް ދެން ކުރިމަތި ލާފައިވަނީ ކުރީގެ ޑެޕިއުޓީ ޕްރޮސެކިއުޓަ ޖެނެރަލް މަރިޔަމް ނިހާޔަތާއި ގާނޫނީ ވަކީލު ރުސްދުﷲ އިބްރާހިމްއެވެ.

ކޮމެންޓް

871x217_placeholder