ފާއިތުވި 24 ގަޑިއިރުގެ ތެރޭގައި ނިރުބަވެރި ޔަހޫދީ ދައުލަތް، އިޒްރޭލުން ޣައްޒާގެ ނިކަމެތި ރައްޔިތުންނަށް ޢަމާޒުކޮށް އަޅަމުންދާ ބޮންތަކުގައި 400 އަށް ވުރެ ގިނަ މީހަކު ޝަހީދުވެއްޖެއެވެ.

ޙަމަލާތައް ހުއްޓާލުމުގެ އެއްބަސްވުމާ ގަސްތުގައި ޚިލާފުވެ، ޣައްޒާގެ ރައްޔިތުންގެ ޓެންޓުތަކަށް އަމާޒުކޮށް އިޒްރޭލުން އަނެއްކާ ވެސް ބޮންތައް އަޅަން ފަށާފައިވަނީ ހޯމަ ދުވަހުގެ ރެއިން ފެށިގެންނެވެ. އެގޮތުން ބާރުގަދަ އެ ޙަމަލާތަކުގައި މިހާތަނަށް 400 އަށް ވުރެ ގިނަ މީހުން ޝަހީދުކޮށްފައިވާއިރު، 600 އަށް ވުރެ ގިނަ މީހުން ވަނީ ޒަޙަމްވެފައެވެ.

އެ ޙަމަލާތައް އަމާޒުވި މީހުންގެ ތެރެއިން ގިނައީ ކުށެއް ނެތް މައުސޫމް ކުޑަކުދިންނާއި އަންހެނުންނެވެ.

އެ ޙަމަލާތަކާ ގުޅޭ ގޮތުން ނިރުބަވެރި ޔަހޫދީ ދައުލަތުގެ ބޮޑު ވަޒީރު ބެންޖަމިން ނަތަންޔާހޫ ވަނީ، އެ ޙަމަލާތަކަކީ ކުރިއަށް ދޭން ހުރި ޙަމަލާތަކުގެ ފެށުން ކަމުގައި ބުނެފައެވެ.

އަދި މީގެ ފަހުން، ޣައްޒާގައި އިޒްރޭލުން ހިންގަމުންދާ ޤަތުލްޢާންމު ހުއްޓާނުލާނެ ކަމުގެ އިންޒާރުދެމުން އޭނާ ވަނީ، ޙަމަލާތައް ހުއްޓާލުމުގެ މަޝްވަރާތައް ވެސް ކުރެވޭނީ ޙަމަލާތަކުގެ ތެރޭގައި ކަމުގައި ބުނެފައެވެ.

ޣައްޒާއަށް އަމާޒުކޮށް އިޒްރޭލުން ޙަމަލާތައް ދޭން އަނެއްކާ ވެސް ފަށާފައިވާއިރު، އެ ޙަމަލާތައް ދޭން ނިރުބަވެރި ދައުލަތުން ފަށާފައިވަނީ އެމީހުންގެ އެންމެ މަދަދުވެރި އެމެރިކާގެ އެހީއާއެކުއެވެ. އެގޮތުން މި ޙަމަލާތައް ފެށުމަށް އެގައުމުގެ ރައީސް ޑޮނަލްޑް ޓްރަމްޕްގެ އަމުރަށް، އެގައުމުގެ މަޖިލީހުގެ ހުއްދައާ ނުލައި 4 ބިލިއަން އެމެރިކާ ޑޮލަރުގެ ހަތިޔާރު އިޒްރޭލަށް ފޮނުވާފައިވާއިރު، އިތުރު 12 ބިލިއަން ޑޮލަރުގެ ހަތިޔާރު އިޒްރޭލަށް ފޮނުވުމުގެ މަސައްކަތް މިހާރު ވެސް އެމެރިކާއިން ދަނީ ކުރަމުންނެވެ.

ޓްރަމްޕް ވިދާޅުވާ ގޮތުގައި އެ ހަތިޔާރުތައް އިޒްރޭލަށް ފޮނުވަނީ، އިޒްރޭލުން ފެށި މަސައްކަތް އަވަހަށް ނިންމުމަށެވެ.