އަންނަ އެޕްރީލް މަހު ފެށޭ ދިރާސީ އާ އަހަރަށް ގްރޭޑް 1 އަށް ވަނުމުގެ ފުރުސަތު 5،700 އަށްވުރެ ގިނަ ދަރިވަރުންނަށް ދީފިއެވެ.

އެޑިއުކޭޝަން މިނިސްޓްރީން ބުނެފައިވަނީ، ގްރޭޑް 1 އަށް ފުރުސަތު ދެވުނު ދަރިވަރުންގެ ތެރެއިން 2،000 އެއްހާ ދަރިވަރުންނަކީ މާލެ ސަރަހައްދުގެ ސްކޫލުތަކުން ފުރުސަތު ދީފައިވާ ދަރިވަރުންކަމަށެވެ. އަދި ގްރޭޑް 1 އަށް ވަނުމުގެ ފުރުސަތު ދަރިވަރުންނަށް ދިނުމަށް ކުރަންޖެހޭ މަސައްކަތްތައް މިހާރު ނިމިފައިވާ ކަމަށްވެސް އެ މިނިސްޓްރީން ވަނީ ހާމަކޮށްފައެވެ.

މިނިސްޓްރީން އިތުރަށް ބުނެފައިވަނީ، ދިރާސީ އަހަރަށް ސަރުކާރު ސްކޫލުތަކުގެ އެލްކޭޖީ، ޔޫކޭޖީ އަދި ގްރޭޑް އެކަކަށް ދަރިވަރުން ވެއްދުމަށް ހުޅުވާލީ މިދިޔަ އަހަރުގެ އޮކްޓޫބަރު މަހުގައި ކަމަށެވެ. މި އިއުލާނާ ގުޅިގެން ލިބުނު އެޕްލިކޭޝަންތައް ދިރާސާކޮށް، ދަރިވަރުން ހޮވުމުގެ މަސައްކަތް ވަނީ ނިންމާފައެވެ.

އަންނަ އެޕްރީލް މަހުގެ 7 ވަނަ ދުވަހު ދިރާސީ އާ އަހަރުގެ ކިޔެވުން ފެށޭނެއެވެ.