އޮރިޔާންކާޑު ގެންގުޅެ، ކުރީގެ އަނބިމީހާއަށް ބްލެކްމެއިލްކުރުމުގެ ތުހުމަތުގައި 57 އަހަރުގެ ދިވެހި ފިރިހެނަކު އިއްޔެ ހައްޔަރުކޮށް 10 ދުވަހަށް ބަންދުކޮށްފިއެވެ.

ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން، މި މީހާގެ މައްޗަށް ތުހުމަތުކުރެވެނީ ހުއްދަ ނެތި ގޯތި ގެދޮރަށް ވަނުމާއި، އޮރިޔާންކާޑު ގެންގުޅުމާއި، ބްލެކްމެއިލްކުރުމާއި އަދި ބިރުދެއްކުމުގެ ކުށްތަކުގައެވެ.

ކޯޓު އަމުރުގައި ބަޔާންކޮށްފައިވާ ގޮތުގައި، މި މައްސަލައިގައި ހާދިސާ ރިޕޯޓާއި އަނިޔާ ލިބުނު ފަރާތުގެ ބަޔާނުގެ އިތުރުން ވެސް ކުށްކުރި ކަމަށް ކޮންމެވެސް މިންވަރެއްގެ ހެކި ހުށަހަޅާފައިވެއެވެ. މިކަމުގެ ސަބަބުން، އޭނާ ކުރީގެ އަނބިމީހާއަށް ބްލެކްމެއިލްކުރި ކަމަށް ބެލެވޭ މިންވަރަށް ހެކި ލިބިފައިވާ ކަމަށް ކޯޓުން ނިންމާފައިވެއެވެ.

މި މައްސަލައިގައި ތުހުމަތުކުރެވޭ ފަރާތް 10 ދުވަހަށް ބަންދުކުރުމަށް އަމުރުކޮށްފައިވަނީ ކްރިމިނަލް ކޯޓުގެ ގާޒީ އިބްރާހިމް އިހުސާނެވެ.