އިންޓަރ މައިއާމީގެ ސުޕަރ ސްޓާރ ލިއޮނެލް މެސީގެ ބޮޑީގާޑް ޔާސިން ޗެއުކޯ ދަނޑުގެ އައުޓްފީލްޑްގައި ހަރަކާތްތެރިވުން މަނާކޮށްފިއެވެ. މިހާރު އޭނާއަށް ހުއްދަ އޮންނާނީ ހަމައެކަނި ލޮކަރ ރޫމާއި މިކްސްޑް ޒޯންގައި މަސައްކަތް ކުރުމަށެވެ.

"އަހަރެންނަށް މިހާރު ދަނޑުމަތީގައި މަސައްކަތް ކުރުމުގެ ހުއްދައެއް ނުދޭ. އަހަރެން ޔޫރަޕްގައި 7 އަހަރު މަސައްކަތް ކުރިން، ލީގް 1 އާއި ޗެމްޕިއަންސް ލީގްގައި. އެހެންނަމަވެސް އެ މުއްދަތުގައި ދަނޑަށް ވަދެގެން އުޅުނީ ހަމައެކަނި 6 މީހުން. އެމެރިކާއަށް އައިސް 20 މަސްދުވަސް ތެރޭގައި 16 މީހުން ވަދެއްޖެ. މިއީ ވަރަށް ބޮޑު މައްސަލައެއް،" ކުރީގެ ޔޫއެސް ނޭވީ ސީލް، ޗެއުކޯ ބުންޏެވެ.

މެސީ ޕެރިސް ސަންޓް ޖަރމަން (ޕީއެސްޖީ) އަށް ބަދަލުވި ހިސާބުން ފެށިގެން ޗެއުކޯ ވަނީ މެސީގެ ބޮޑީގާޑެއްގެ ގޮތުގައި މަސައްކަތް ކުރަމުންނެވެ. "އަހަރެން އެމްއެލްއެސް އާއި ކޮންކަކަފް ވަރަށް ލޯބިވޭ، އެހެންނަމަވެސް އަޅުގަނޑުމެން އެބަޖެހޭ އެކުގައި މަސައްކަތް ކުރަން. އަހަރެން އެހީތެރިވުމަށް ވަރަށް ލޯބިވޭ. އަހަރެންނަކީ އެހެން މީހުންނަށްވުރެ މޮޅު މީހެއް ނޫން، އެހެންނަމަވެސް ޔޫރަޕްގައި ވަރަށް ގިނަ ތަޖުރިބާ ލިބިފައިވޭ،" އޭނާ ވިދާޅުވިއެވެ.

ބައެއް ރިޕޯޓުތަކުގައި ބުނާ ގޮތުން މިއީ އެމްއެލްއެސްގެ ނިންމުމެއް ނޫން ކަމަށާއި، އިންޓަރ މައިއާމީން ނިންމި ނިންމުމެއް ކަމަށް ބެލެވެއެވެ. ނަމަވެސް މިކަން އަދި ވަނީ ރަސްމީކޮށް ކަށަވަރު ކޮށްދީފައެއް ނޫނެވެ. އެނގިފައިވާގޮތުގައި ދަނޑުގެ ސެކިއުރިޓީ ބެލެހެއްޓުމުގެ އެންމެހައިކަންކަން އިންތިޒާމް ކުރާނީ ލީގާއި ކުލަބާއި ގުޅިގެންނެވެ.

އިންޓަރ މައިއާމީން ކުރިއަށް އޮތް އަންގާރަ ދުވަހު ކޮންކަކަފް ޗެމްޕިއަންސް ކަޕްގެ ކުއާޓަރ ފައިނަލްގެ ފުރަތަމަ ލެގްގައި އެލްއޭއެފްސީ އާ ކުރިމަތިލާނެއެވެ. މި މެޗުގައި މެސީ ކުޅުމަށް ހަމަޖެހިފައިވެއެވެ.