ދެކުނުގެ ރަށެއްގައި ނުކުޅެދުންތެރިކަން ހުންނަ މީހަކަށް ޖިންސީ ގޯނާ ކުރި ފިރިހެނަކު، ޝަރީއަތް ނިމެންދެން ބަންދުކޮށްފިއެވެ.

ފުލުހުން ބުނީ، މީގެ ހަތަރު މަސް ކުރިން އެ އިދާރާއަށް ހުށަހެޅި ރިޕޯޓަކާ ގުޅިގެން، މިދިޔަ ބުދަ ދުވަހު ކޯޓު އަމުރެއްގެ ދަށުން 57 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އޭނާ ހައްޔަރުކުރީ ނުކުޅެދުންތެރިކަން ހުންނަ ފިރިހެނަކަށް ޖިންސީ ގޯނާކުރިކަމަށް ތުހުމަތުކުރެވޭ މައްސަލައަކާ ގުޅިގެން ކަމަށް ވެސް އެ އިދާރާއިން ބުންޏެވެ.

Ad by Hajj Corporation

ފުލުހުން ބުނީ، އޭނާގެ ބަންދާ މެދު ގޮތެއް ނިންމުމަށް މިދިޔަ ބުރާސްފަތި ދުވަހު ކޯޓަށް ހާޒިރުކުރުމުން، ޝަރީޢަތް ނިމެންދެން ބަންދުކުރުމަށް ކޯޓުން އަމުރުކޮށްފައިވާ ކަމަށެވެ.

އެ މައްސަލައިގައި ރައްދުވާ ފަރާތުގެ އިތުރު ވަނަވަރު ފުލުހުން ހާމަކޮށްފައެއް ނުވެއެވެ. އެ މައްސަލައިގެ ބާވަތުން، ގާނޫނުން ބުނާ ގޮތަށް އެ މައްސަލަ ފުލުހުން ތަހުގީގުކުރަމުންދަނީ ކުޑަ ކުއްޖަކަށް ޖިންސީ ގޯނާ ކުރި މައްސަލައެއްގެ ގޮތުގައެވެ. އެހެންކަމުން އެ ޙާދިސާ ހިނގި ރަށް ވެސް ފުލުހުން ހާމަކޮށްފައެއް ނުވެއެވެ.