ރާއްޖޭގައި ދުންފަތުގެ އިސްތިއުމާލު ކުރެވޭ އުމުރު ފުރާ ކަނޑައެޅުމާ ގުޅޭގޮތުން ސިއްހަތާ ބެހޭ ވުޒާރާއިން ދުނިޔޭގެ ސިއްޙަތު ޖަމުއިއްޔާ އާއި ޔުނިސެފާ އެކު މަޝްވަރާ ކޮށްފި އެވެ.

މި މަޝްވަރާތައް ކުރިއަށްގެންދަނީ ސިއްޙީ ވުޒާރާގަ އެވެ. ސިއްހަތާ ބެހޭ ވުޒާރާއިން ބުނީ ދުންފަތުން ރައްކާތެރި ޖީލެއް ބިނާކުރުމަށް ޖެނެރޭޝަނަލް ބޭން ތަޢާރަފުކުރުމަށް ކަމާގުޅުންހުރި ފަރާތްތަކުގެ ޚިޔާލު ހޯދުމަށް ސަރުކާރުން ކުރަމުންދާ މަޝްވަރާތަކުގެ ތެރެއިން ޑަބްލިޔުއެޗްއޯ އާއި ޔުނިސެފްގެ އޮފިޝަލުންނާ، ޞިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހީމް މިއަދު ބައްދަލުކުރައްވަފައިވާ ކަމަށެވެ. އަދި އެކަމާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރި ކަމަށް މައުލޫމާތު ދެއެވެ.

ރާއްޖޭގައި ދުންފަތުގެ އިސްތިއުމާލުކުރުން ހުއްޓުވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނުހަނު ބޭނުންފުޅުވާ ކަމެކެވެ. ދިވެހި ޅަދަރިން ދުންފަތުގެ ނުރަނގަޅު އާދައިގެ ތެރެއަށް ދޫކޮށްލައިގެން ސަރުކާރެއް އޮންނަންޖެހޭ ކަމަށް ގަބޫލުނުކުރާ ކަމަށާއި ދުންފަތުގެ އިސްތިއުމާލުކުރުން އާދައަކަށް ނުވަނީސް އެކަން ހުއްޓުވަން ޖެހޭ ކަމަށް އެމަނިކުފާނު ވަނީ ވިދާޅުވެފައެވެ.

"ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި، ޒުވާން ޖީލު ދުންފަތާ ދުރުކުރުމަށް އެކަށައަޅުއްވާފައިވާ ޖެނެރޭޝަނަލް ބޭންއާ ގުޅޭ ގޮތުން ވާހަކަފުޅު ދައްކަވަމުން ރައީސް ވިދާޅުވީ، ދުންފަތުގެ މައްސަލައަކީ ރާއްޖޭގައި ބޮޑު މައްސަލައަކަށްވާއިރު، އެމަނިކުފާނު މަސައްކަތްކުރައްވަނީ އެ މައްސަލައަށް ޙައްލެއް ހޯއްދެވުމަށްކަމަށާއި، އެފަދަ ނުރަނގަޅު އާދައެއް، މުޖްތަމައު ތެރެއަށް ދޫކޮށްލައިގެން ސަރުކާރުތަކުން ތިބެންޖެހޭ ސަބަބެއް އެމަނިކުފާނަށް ނުވިސްނޭ ކަމަށެވެ.

ރާއްޖޭގައި ދުންފަތުގެ އިސްތިއުމާލު ކުރެވޭ އުމުރު ފުރާ ކަނޑައެޅުމަށް އާއްމުންގެ ހިޔާލު ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ހުޅުވަލާފަ އެވެ.