ނިއުދިއްލީ: ހިމާޗަލް ޕްރަދޭޝްގެ މަނާލީގައި ހުރި އޭނާގެ ބޭނުން ނުކުރާ ގެއަށް 1 ލައްކަ ރުފިޔާގެ ކަރަންޓު ބިލެއް ލިބިފައިވާ ކަމަށް ވިދާޅުވެ، އިންޑިއާގެ ބީޖޭޕީގެ އެމްޕީ އަދި އެކްޓަރުކަމުން ސިޔާސީ މައިދާނަށް ނުކުތް ކަންގަނާ ރަނާއުތު ރުޅިގަނޑު ފަޅައިގެން ހިނގައްޖެއެވެ.

އޭނާގެ ޕާލިމެންޓަރީ ދާއިރާ ކަމުގައިވާ މަންޑީގައި ބޭއްވި ޖަލްސާއެއްގައި ވާހަކަދައްކަވަމުން، ކަންގަނާ ވަނީ އިދާރީ ނާކާމިޔާބުކަމާއި މާލީ ކަންކަން ބެލެހެއްޓުމުގައި ހުރި އުނިކަމަށް ބުނެ ރުޅިގަދަވެ، ކޮންގްރެސް އިދާރާއަށް ފާޑުކިޔާފައެވެ.

Ad by Hajj Corporation

"ހިމާޗަލް ޕްރަދޭޝްގައި ކޮންގްރެސްއިން ވަނީ މިހާ ދެރަ ހާލަތެއް އުފައްދާފައި. މިމަހު އަހަރެންނަށް މަނާލީގައި ހުރި އަހަރެންގެ ގެއަށް 1 ލައްކަ ރުފިޔާގެ ކަރަންޓު ބިލެއް ލިބުނު. އެއީ އަހަރެން ދިރިއުޅޭ ތަނެއް ވެސް ނޫން. މިތާނގެ ހާލަތު ހުރިގޮތް ތިބާއަށް ވިސްނައިލެވޭތޯ ބަލާ!،" އޭނާ ވިދާޅުވިއެވެ.

ކަންގަނާގެ މި ވާހަކައަށް ހިމާޗަލް ޕްރަދޭޝް ކޮންގްރެސް ޔުނިޓުން ވަނީ އަވަސް ޖަވާބެއްދީފައެވެ. އޭނާގެ ބަސްތައް "އިންސާފުވެރި ނޫން" އަދި "ޒިންމާދާރުކަން ކުޑަ" ކަމަށް ބުނެ، ކޮންގްރެސްއިން ވަނީ އެއްވެސް ކަމެއް ނަހަމަ ގޮތުގައި ކޮށްފައިވާކަމުގެ ތުހުމަތުތައް ދޮގުކޮށް، އަދި ބީޖޭޕީގެ އެމްޕީއަށް ގޮވާލާފައިވަނީ މިފަދަ މައްސަލަތައް އާންމުކޮށް ތުހުމަތުކުރުމުގެ ބަދަލުގައި އެކަށީގެންވާ ރަސްމީ ޗެނަލްތަކުން ކުރިއަށް ގެންދިއުމަށެވެ.

މަޖިލިސް މެމްބަރަކަށް ވުމާ ގުޅިގެން ކަންގަނާ މިހާރު ދިރިއުޅެނީ ނިއު ދިއްލީގައި ކަމަށް ވާއިރު، އޭނާ މިހާރު ދިރިނޫޅޭ ގެއަކަށް މިފަދަ ބޮޑު ބިލެއް އައުމާ ގުޅިގެން، ހިމާޗަލް ޕްރަދޭޝް ސްޓޭޓުގެ ސަރުކާރުގެ ކަމާބެހޭ ފަރާތްތަކުން މިކަން ބަލައި، އަޅަންޖެހޭ ފިޔަވަޅުތައް އަޅާނެކަމަށް ބެލެވެއެވެ.