ރާއްޖޭން ފަލަޞްތީނުގެ ޣައްޒާއަށް ފޮނުވި ބައިމިލިއަން ދިވެހި ރުފިޔާގެ ކާބޯތަކެތި ވާޞިލުވެއްޖެއެވެ.

ޒަކާތު ހައުސްއަށް ދިވެހި ރައްޔިތުން ހަވާލުކުރި ފިޠުރު ޒަކާތުން ފަލަޞްޠީނުގެ ޣައްޒާގެ ބަނޑުހައި ހޫނުކަމުގައި ޖެހިފައިވާ އާއިލާތަކަށް ފަސް ލައްކަ ދިވެހި ރުފިޔާގެ ކާބޯތަކެތި ފޮނުވުމަށް އިސްލާމީ ކަންތައްތަކާ ބެހޭ ވުޒާރާއިން ނިންމާފައިވާ ކަމަށް ވަޒީރު ޑރ. މުހައްމަދު ޝަހީމް އަލީ ސައީދު ވަނީ ވިދާޅުވެފައެވެ. އެގޮތުން މިހާރު އެތަކެތި ޣައްޒާއަށް ވާޞިލުވެއްޖެކަމަށް ވުޒާރާއިން ބުނެއެވެ.

ދިވެހިރާއްޖޭގެ ޒަކާތު ހައުސްއިން ޣައްޒާއަށް އެހީވުމަށް ކަނޑައެޅި ފަސް ލައްކަ ރުފިޔާ ހަވާލުކޮށްފައިވަނީ އިސްރާ އެސޯއިއޭޝަނާއެވެ. އަދި އެ އެސޯސިއޭޝަނާއި ފަލަސްޠީނުގައި ހަރަކާތްތެރިވާ އެހީދޭ ފަރާތްތައް ގުޅިގެން މި އެހީ މިހާރުވަނީ ފަލަސްޠީނު ރައްޔިތުންނާއި ހަމައަށް ފޯރުކޮށްދީފައެވެ.

ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ރާއްޖޭގެ ޒަކާތު ފަންޑުން ޣައްޒާއަށް ކާބޯތަކެތީގެ އެހީތެރިކަން ފޯރުކޮށްދިނުމަށް މަސައްކަތް ކުރަމުންދާކަން މީގެ ކުރިން ވުޒާރާއިން ވަނީ ހާމަކޮށްފައެވެ. އެގޮތުން ޒަކާތު ފަންޑުން ވަނީ މީގެ ކުރިން، މިދިޔަ އަހަރުގެ ޑިސެމްބަރު މަހުގައި ވެސް ޣައްޒާއަށް އެއްލައްކަ އެމެރިކާ ޑޮލަރުގެ އެހީ ފޮނުވާފައެވެ. އަދި ޒަކާތު އެހީގެ ދަށުން ޣައްޒާގައި ވޯޓާ ސަޕްލައި ޕްރޮޖެކްޓެއް ވެސް ވަނީ ލޯންޗްކޮށްފައެވެ.

ޒަކާތު ފަންޑަކީ ފަގީރުންނާ މިސްކީނުންނަށް އެހީވާން، އިސްލާމިކް މިނިސްޓްރީގައި އުފައްދާފައިވާ ފަންޑެކެވެ. އެ ފަންޑުގެ ހިންގުން ވަރުގަދަ ކުރުމަށް ޒަކާތު ހައުސްގެ ނަމުގައި އިދާރާއެއް ވެސް ވަނީ ގާއިމުކޮށްފައެވެ.