ރާއްޖެއިން ބޭރުގެ ހަތަރު ޤައުމެއްގައި އައިޑީކާޑު ޕްރިންޓުކުރުމުގެ ޚިދުމަތް ފެށުމުގެ މަސައްކަތްތައް ކުރާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނެފިއެވެ.

"ސަރުކާރު" ވެބްސައިޓުގައި އެ ވުޒާރާއިން ޝާއިއުކުރި ލިޔުމެއްގައި ބުނީ، އާއްމުކޮށް ދިވެހިން ގޮސްއުޅޭ ބައެއް ޤައުމުތަކުގައިވެސް މި ޚިދުމަތް ފެށުމަށް ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު)އިން ތައްޔާރުވަމުންދާ ކަމަށާއި، އެ ޤައުމުތަކަކީ މެލޭޝިއާއާއި، ސްރީލަންކާއާއި، އިންޑިއާގެ އިތުރުން އިނގިރޭސިވިލާތް ކަމަށެވެ.

އެ ޚިދުމަތް އެ ޤައުމުތަކުގައި ފެށޭނެ ދުވަހެއް އެ ވުޒާރާއިން އަދި ހާމަކޮށްފައެއް ނުވެއެވެ.

މީގެ އިތުރުން އެ ވުޒާރާއިން ބުނީ، މާލެއިން އެކަނި ލިބޭ އައިޑީކާޑާއި ޕާސްޕޯޓް ހެދުމުގެ ޚިދުމަތް ލާމަރުކަޒީ ނިޒާމުގެ ތެރެއިން ރައްޔިތުންނާއި ގާތުން ދެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވައުދުފުޅެއް ކަމަށާއި، އެ ވައުދުފުޅު ފުއްދުމަށްޓަކައި އިތުރު ހަތަރު ރަށެއްގައި އައިޑީކާޑު ޕްރިންޓްކުރުމުގެ ޚިދުމަތް މިމަހުގެ ތެރޭގައި ފެށުމަށް ވެސް ޑީއެންއާރް އިން ތައްޔާރުވެފައިވާ ކަމަށެވެ.

އެގޮތުން އައިޑީކާޑު ޕްރިންޓްކުރުމުގެ ޚިދުމަތް ފަށަން ނިންމާފައި ވަނީ މ.މުލީ، ށ.ފުނަދޫ، ށ.މިލަންދޫ އަދި ނ.ވެލިދޫގައެވެ.

15 ރަށެއްގައި އައިޑީ ކާޑު ޕްރިންޓު ކުރުމުގެ ޚިދުމަތް މިހާރުވެސް ދަނީ ދެމުންނެވެ.