މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް، އަލްފާޟިލް އަޙްމަދު ޝިޔާމް، ދިވެހިރާއްޖެއަށް އަލަށް ޢައްޔަންކުރެވުނު ޖަޕާނުގެނުގެ ސަފީރު، އެކްސެލެންސީ މިސިސް އިޝިގާމީ ރުމިކޯއާ މިއަދު ބައްދަލުކުރައްވައި، ދެ ޤައުމުގެ މަސްވެރިކަމުގެ ގުޅުން އިތުރަށް ހަރުދަނާކުރުމާ ގުޅޭގޮތުން މަޝްވަރާކުރެއްވިއެވެ.

މި ބައްދަލުވުމުގައި މިނިސްޓަރ ޝިޔާމް، ދިވެހިރާއްޖޭގެ މަސްވެރިކަމުގެ ދާއިރާ ކުރިއެރުވުމުގައި ޖަޕާނު ސަރުކާރުން ދެއްވަމުންގެންދަވާ އެހީތެރިކަމާއި އެއްބާރުލެއްވުމަށް ޝުކުރު ދެންނެވިއެވެ. ޚާއްޞަކޮށް މަސްވެރިކަމާ ގުޅުންހުރި އެކިއެކި ތަމްރީނު ޕްރޮގްރާމްތަކުގެ ތެރެއިން އިންސާނީ ވަސީލަތްތައް ތަރައްޤީކުރުމަށް ޖަޕާނުން ކޮށްދެއްވާފައިވާ މަސައްކަތްތައް ފާހަގަކުރެއްވިއެވެ. މިގޮތުން މިހާރު ކުރިއަށްގެންދެވޭ "ޕްރޮޖެކްޓް ފޮރ ޕްރޮމޯޝަން އޮފް ބްލޫ އިކޮނޮމީ އިން ދަ ފިޝަރީޒް ސެކްޓަރ އިން މޯލްޑިވްސް" އަކީ ޚާއްޞަ ސަމާލުކަމެއް ދެވޭ މުހިންމު ޕްރޮޖެކްޓެއްކަން ފާހަގަކުރެއްވިއެވެ. މި ޕްރޮޖެކްޓުގެ ދަށުން މަސްދޯނިތަކުގައި ދިގު މުއްދަތަކަށް އެން ރައްކާކުރެވޭނެ ގޮތަށް އެންވަތް ތަރައްޤީކުރުމުގެ ހަރަކާތްތަކެއް ވަނީ ކުރިއަށް ގެންގޮސްފައެވެ. މީގެއިތުރުން، އަގުއެއްކުރުމުގެ ތަމްރީނު ޕްރޮގްރާމްތަކެއް ރ. މަޑުއްވަރި، ފ. ނިލަންދޫ އަދި މ. ދިއްގަރުގައި ވަނީ ހިންގާފައެވެ.

މި ބައްދަލުވުމުގައި ސަފީރު އިޝިގާމީ ރުމިކޯ ވިދާޅުވީ، ދިވެހިރާއްޖޭގެ މަސްވެރިކަމުގެ ދާއިރާއަށް އެހީތެރިވުމުގައި ޖަޕާނު ސަރުކާރުން ދެމިހުންނާނެ ކަމަށާއި، ދިވެހިރާއްޖެއަށް ބޭނުންވާ މަސްވެރިކަމުގެ ތަރައްޤީގެ ކޮންމެ ދާއިރާއަކަށް އެހީތެރިވުމަށް ޖަޕާނު ތައްޔާރަށް ހުރިކަމުގައެވެ.