ފްރެންޗް ލީގުގެ ޗެމްޕިއަންކަން ކަށަވަރުކޮށްފައިވާ ޕެރިސް ސެއިންޓް ޖަރމޭން (ޕީއެސްޖީ) އަށް މި ސީޒަންގައި ލީގުގައި ބަލިނުވެ ދަމަހައްޓަމުން އައި ރިކޯޑު ނިމުމަކަށް އައިސްފިއެވެ. ޕީއެސްޖީ ރޭގައި ބަލިވީ ނީސްއާ ދެކޮޅަށް ކުޅުނު މެޗުން 3-1 ގެ ނަތީޖާއަކުންނެވެ.

މި ސީޒަންގައި މިހާތަނަށް ކުޅުނު 31 މެޗުން ޕީއެސްޖީ އަށް 78 ޕޮއިންޓް ލިބިފައިވާއިރު، ދެވަނައިގައިވާ މާސޭ އަށް ލިބިފައިވަނީ 55 ޕޮއިންޓެވެ. މިއީ ޕީއެސްޖީ އަށް މި ސީޒަންގައި ލީގުން ލިބުނު ފުރަތަމަ ބަލިވުމެވެ.

ޕާކް ޑި ޕްރިންސަސް ސްޓޭޑިއަމްގައި ކުޅުނު މެޗުގައި ނީސްގެ މޯގަން ސެންސަން ވަނީ ދެ ލަނޑު ޖަހާފައެވެ. އޭނާ ފުރަތަމަ ލަނޑު ޖެހީ މެޗުގެ 34 ވަނަ މިނެޓުގައެވެ. ޕީއެސްޖީގެ ފަބިއަން ރުއިޒް ފުރަތަމަ ހާފު ނިމުމުގެ ކުރިން މެޗު އެއްވަރު ކުރި ނަމަވެސް، ދެވަނަ ހާފުގެ ފުރަތަމަ މިނެޓުގައި ސެންސަން އިތުރު ލަނޑެއް ޖެހިއެވެ.

މެޗުގެ ނަތީޖާ ނީސްގެ ކާމިޔާބީއަކަށް ބަދަލުކޮށްދިނީ މެޗު ނިމުމުގެ 20 މިނެޓު ކުރިން ޔޫސުފް އެންޑައިޝިމިޔޭ އެވެ. އޭނާ މި ލަނޑު ޖެހީ ނީސްއަށް ލިބުނު ހިލޭ ޖެހުމަކުން ބޮލުން ޖަހައިގެންނެވެ.
ރޭގެ މެޗުގައި ނީސް ގެ ކީޕަރުވަނީ ޕީއެސްޖީއިން ފޮނުވާލި ގިނަ ހަމަލާތަކެއް ދިފާއު ކޮށް، މިސީޒަނުގައި އެއްމެޗެއްގައި ލީގްވަން ގައި އެންމެ ގިނަ ސޭވް ކުރުމުގެ ރެކޯޑް ހަދާފައެވެ.

މެޗަށްފަހު ޕީއެސްޖީގެ ކޯޗް ލުއިސް އެންރީކޭ ވިދާޅުވީ ނީސްގެ ޑިފެންސް ލައިން ވަރަށް ވަރުގަދަ ކަމަށާއި، ޔުއެފާ ޗެމްޕިއަންސް ލީގުގެ ސެމީ ފައިނަލްގައި އާސެނަލްއާ ދެކޮޅަށް ކުޅޭ މެޗުގައިވެސް އެޓޭކިން ގޭމެއް ކުޅޭނެ ކަމަށް އުންމީދުކުރައްވާ ކަމަށެވެ.