މިދިޔަ އެމްޑީޕީގެ ސަރުކާރުން ދުލެއް ''ނުކުރާނަމޭ ބުނެ ރައްޔަތުންނަށް ދޮގުހަދާފަ ފިލީ ކަމަށާއި، ނަމަވެސް މިސަރުކާރުން އެހެނެއް ނުހަދާނެ ކަމަށް ބާރަށު ދާއިރާގެ މެންބަރު، ޕީއެންސީގެ ނައިބު ރައީސް އިބްރާހީމް ޝުޖާޢު ވިދާޅުވެއްޖެއެވެ.

ޝުޖާޢު މިހެން ވިދާޅުވީ 23 އޭޕްރިލް 2019 ގައި އޭރުގެ ގަލޮޅު ދެކުނު ދާއިރާގެ މެމްބަރު އީވާ ޢަބުދުﷲ އެކްސްގައި ކުރެއްވި ޕޯސްޓެއް އެކްސްގައި ޝެއާ ކުރަށްވަމުންނެވެ. އެއީ ޔާމީން ރަޝީދު މަރާލިތާ ދެ އަހަރު ފުރުމުން ޔާމީންގެ ޢާއިލާ އިންނާއި ހެޔޮއެދޭ ފަރާތްތައް އިސްނަގައިގެން ޔާމީނަށް އިންސާފް ހޯދަން ގޮވާލައި ބޭއްވި ހިނގާލުކެވެ.

އެ ހިނގާލުމުގައި އޭރުގެ ރައީސް، އެމްޑީޕީގެ އިބްރާހީމް މުހައްމަދު ސޯލިހާއި އެ ސަރުކާރުގެ ބައެއް ވެރިން ވެސް ބައިވެރިވިއެވެ.

އީވާގެ ޕޯސްޓްގައި ''އަނިޔާވެރި މަރުގެ ދެ އަހަރު ފަހުން، ވަގަށް ނެގުމުގެ ހަތަރު އަހަރު ފަހުން،'' އާއިލާތަކާއި ލޯބިވާ މީހުންނަށް ޙަޤީޤަތް އެނގި، ކޮންމެވެސް ވަރެއްގެ އިންސާފު ލިބިދާނެކަމުގެ އުންމީދެއް އޮތްކަމަށް ވަނީ ލިޔުއްވާފައެވެ.

ނަމަވެސް އެމްޑީޕީގެ ސަރުކާރު ނިމިގެން ދިޔައިރު ވެސް އެމަރުތަކަށް އިންސާފެއް ނުހޯދުނެވެ. އެ މަރުތަކަށް އިންސާފް ހޯދައިދިނުމަކީ އެމްޑީޕީން ކެމްޕޭންގައި ވިއްކި އެންމެ ބޮޑު އެއް ވައުދެވެ. ނަމަވެސް އެމްޑީޕީ އެކަމުން ވަނީ ފެއިލް ވެފައެވެ.

''އެމްޑީޕީގެ ސަރުކާރުން ދުލެއް ނުކުރާނަމޭ ކިޔާ ދޮގުހަދާފަ ފިލީ. މިސަރުކާރުން އެހެނެއް ނުހަދާނެ.'' އެމްޑީޕީ އަށް އިޝާރާތްކުރަށްވައި ޝުޖާޢު ވިދާޅުވެފަވެއެވެ.

އެމްޑީޕީން އެ މަރުތަކަށް އިންސާފް ހޯދައިދޭންކަމަށް ބުނެ، އޭރު ރައީސް ސޯލިހް މަރުކޮމިޝަނެއް ވެސް އުފެއްދިއެވެ. މިލިއަނުން ބޭކާރު ޚަރަދު ކުރުމަށްފަހު މި ކޮމިޝަނަށް ވެސް އެއްވެސް ނަތީޖާއެއް ނުހޯދުުނެވެ. ވީހާވެސް ކަމަކީ އެކްޓިވިސްޓުން ކޮޅަކަށް މުސާރަ ދިނުމެވެ.

ނަމަވެސް، މިހާރު ދިމާވެގެން އުޅޭ ކަމުގައި މި ސަރުކާރުން ދަނީ ޒުވާނުންގެ އަޑު އަހަމުން، ހިކުމަތްތެރިކަމާއެކު ފިޔަވަޅުތައް އަޅަމުންނެވެ. ޒުވާނުންނަށް ޝުޢޫރު ފާޅު ކުރުމުގެ ފުރުސަތު ދީފައިވާއިރު، އޭގެ ތެރެއަށް ވެސް އެމްޑީޕީން ވަދެގަނެ ނާޖާއިޒް ފައިދާ ނެގުމުގެ މަސައްކަތް އަންނަނީ ކުރަމުންނެވެ.