ރިއަލް މެޑްރިޑް އަދި ބާސެލޯނާ ބައްދަލުކުރި ކޯޕާ ޑެލް ރޭ ފައިނަލްގައި ހިނގި ހާދިސާއަކާ ގުޅިގެން ރިއަލް މެޑްރިޑްގެ ޑިފެންޑަރު އެންޓޯނިއޯ ރުޑިގަރ 4 އާއި 12 ދެމެދުގެ މެޗުގެ ސަސްޕެންޝަނެއް ކުރިމަތިވެދާނެ ކަމަށް ރިޕޯޓުތަކުން ދައްކައިފިއެވެ.

އިތުރުވަގުތާއެކު 120 މިނެޓް ކުޅުމަށްފަހު ޖުލްސް ކޮންޑޭގެ ލަނޑަކުން ބާސެލޯނާ ކަށަވަރުކުރި މި މެޗުގެ ފަހުވަގުތު، ރުޑިގަރު ރެފްރީ ޑި ބަރގޯސް ބެންގޮއެޓެކްސެއާ ދިމާލަށް އައިސް ޕެކެއް އެއްލި މަންޒަރު ކެމެރާތަކުން ފެނިގެން ގޮސްފައިވެއެވެ. ރުޑިގަރ ހިތްހަމަނުޖެހުން ފާޅުކުރީ އެމްބާޕޭ އެރިކް ގާސިއާއަށް ފައުލެއް ހެދުމުން ރެފްރީ އެކަމާމެދު ފިޔަވަޅު ނޭޅުމާ ގުޅިގެންނެވެ.

ސްޕެއިންގެ ރޭޑިއޯ ނެޓްވާރކް ކަޑޭނާ ސެރުން ބުނާ ގޮތުގައި ރުޑިގަރުގެ މި ހަރަކާތަކީ ޑިސިޕްލިނަރީ ކޯޑުގެ 101 ވަނަ މާއްދާގެ ދަށުން އަދަބު ލިބިދާނެ ކަމެކެވެ. މެޗު އޮފިޝަލުންނާ ދެކޮޅަށް ކުރާ ސީރިއަސް ކުށްތަކަށް މި މާއްދާގެ ދަށުން 4 އިން 12 މެޗުގެ ސަސްޕެންޝަނެއް ދެވިދާނެއެވެ.

މި މައްސަލައިގައި ރިއަލް މެޑްރިޑުން ރުޑިގަރަށް ފުރިހަމަ އެއްބާރުލުން ދޭނެ ކަމަށާއި، އޭނާއަށް އެއްވެސް ސަސްޕެންޝަނެއް ދީފިނަމަ އެކަމާ ދެކޮޅަށް އިސްތިއުނާފު ކުރާނެ ކަމަށް ވަނީ ބުނެފައެވެ. މި މައްސަލައިގައި ކޮމްޕެޓިޝަން ކޮމިޓީން މިއަދު ވެސް ނިހާއީ ނިންމުމެއް ނިންމާނެ ކަމަށް ބެލެވެއެވެ.