އިނގިރޭސި އެފްއޭ ކަޕްގެ ސެމީ ފައިނަލުގައި ރޭ ނޮޓިންހަމް ފޮރެސްޓް އާއި ދެކޮޅަށް މެންޗެސްޓަރ ސިޓީ ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް މުބާރާތުގެ ފައިނަލުގެ ޖާގައެއް ހޯދައިފި އެވެ. މިއީ މި މުބާރާތުގެ ފައިނަލުގައި އެ ޓީމުން ޖެހިޖެހިގެން ކުޅޭނެ ތިންވަނަ ފަހަރެވެ.

ފޮރެސްޓުގެ ދަނޑުގައި ކުޅެވުނު މި މެޗުގައި މެންޗެސްޓަރ ސިޓީގެ ފުރަތަމަ ލަނޑު ކާމިޔާބުކޮށްދިނީ މެޗުގެ ދެވަނަ މިނިޓުގައި މަޓިއޯ ކޮވަސިޗް ދިން ބޯޅައަކުން ރިކޯ ލުވިސް އެވެ. އަދި ދެވަނަ ލަނޑު ކާމިޔާބުކޮށްދިނީ މެޗުގެ 51 ވަނަ މިނިޓުގައި އޮމަރ މަރްމޫޝް ނެގި ކޯނަރަކުން ގްވަޑިއޯލް އެވެ.

މެޗުގެ ދެވަނަ ހާފުގައި ނޮޓިންހަމް ފޮރެސްޓަށް މެޗުގެ ނަތީޖާ އެއްވަރު ކުރުމުގެ ރަނގަޅު ފުރުސަތެއް ލިބުނެވެ. އެގޮތުން ކަލަމް ހަޑްސަން އޮޑޯއި އަރިމަތިން ހުރަސް ކުރި ބޯޅަ އެންތޮނީ އެލަންގާ އޭރިޔާ ތެރޭގައި ހުރެ ފޮނުވާލި ނަމަވެސް އެ ބޯޅަ ވަނީ ގޯލުގެ ދަނޑި ކައިރިން ބޭރުވެފައެވެ.

ފާއިތުވެދިޔަ ހަތަރު ސީޒަނުގައި ޕްރިމިއާ ލީގުގެ ޗެމްޕިއަންކަން ހޯދާފައިވާ މެންޗެސްޓަރ ސިޓީ އަށް މި ސީޒަނުގައި އެދެވޭ ނަތީޖާތަކެއް ހޯދިފައިނުވާއިރު، އެ ޓީމަށް މި ސީޒަނުގައި ކާމިޔާބު ކުރެވެން އޮތް ހަމައެކަނި މުބާރާތަކީ މިހާރު އެފްއޭ ކަޕް އެވެ.

އެފްއޭ ކަޕްގެ ފައިނަލުގައި މެންޗެސްޓަރ ސިޓީ ކުޅޭނީ އަންނަ މެއި މަހުގެ 17 ވަނަ ދުވަހު ކްރިސްޓަލް ޕެލަސް އާއި ދެކޮޅަށެވެ.