ޔޫރޮޕާ ލީގުގެ ސެމީ ފައިނަލުގެ ފުރަތަމަ ލެގުގައި އެތްލެޓިކް ބިލްބާއޯ އާއި ދެކޮޅަށް މެންޗެސްޓަރ ޔުނައިޓެޑް ވަނީ 3-0 ގެ ނަތީޖާއަކުން މޮޅުވެފައެވެ. މި މޮޅާއެކު ޔުނައިޓެޑް ވަނީ ފައިނަލުގެ ޖާގައަކާ ވަފިޔަވަޅަކާއި ގާތަށް ޖެހިލާފައެވެ.

ރޭ ބިލްބާއޯގެ ދަނޑުގައި ކުޅުނު މެޗުގައި ޔުނައިޓެޑްގެ ފަރާތުން ކަސެމީރޯ ފުރަތަމަ ގޯލު ޖަހާފައިވާއިރު، އަނެއް ދެގޯލު ޖެހީ ބްރޫނޯ ފެނާންޑޭޒް އެވެ. މެޗުގެ 30 ވަނަ މިނިޓުގައި ކަސެމީރޯ ޖެހި ލަނޑުން ޔުނއިޓެޑް ލީދުނެގިއެވެ. އަދި ފުރަތަމަ ހާފުގެ 35 ވަނަ މިނިޓުގައި ބިލްބާއޯގެ ޑެނީ ވިވިއަންރަސްމުސް ހޮއިލަންޑް އަށް ކުރި ފައުލަކާއި ގުޅިގެން އޭނާއަށް ރަތް ކާޑު ދައްކައި ޔުނައިޓެޑް އަށް ވަނީ ޕެނަލްޓީ ލިބިފައެވެ. މިޕެނަލްޓީ ބްރޫނޯ ވަނީ ފަސޭހަ ހަމާއެކު ކާމިޔާބުކޮށްފައެވެ.

ފުރަތަމަ ހާފު ނިމެން މިނިޓަކަށް ވެފައި އޮއްވާ ބްރޫނޯ ޖެހި އިތުރު ލަނޑާއެކު މެޗުގެ ނަތީޖާ 3-0 އަށް ބަދަލުވިއެވެ. މި ލަނޑާއެކު މި މުބާރާތުގައި ބްރޫނޯ ޖެހި ލަނޑުގެ އަދަދު ވަނީ ހަތަކަށް އަރާފައެވެ.

މެޗުގެ ދެވަނަ ހާފުގައިވެސް ޔުނައިޓެޑް އިން ވަނީ ރަނގަޅު ކުޅުމެއް ދައްކާ، އިތުރު ލަނޑު ޖެހުމަށް ގިނަ ހަމަލާތަކެއް ފޮނުވާލާފައެވެ.

މި މޮޅާއެކު އަންނަ ހަފުތާގައި އޯލްޑް ޓްރެފަޑްގައި ކުޅޭ ދެވަނަ ލެގަށް ނިކުތުމުގެ ކުރިން ޔުނައިޓެޑް އަށް ވަނީ ބޮޑު ހިތްހަމަޖެހުމެއް ލިބިފައެވެ.

ލީގުގެ 14 ވަނައިގައި އޮތް ޔުނަޢިޓެޑް އަށް އަންނަ ސީޒަނުގައި ޗެންޕިއަންސް ލީގުގެ ޖާގައެއް ލިބެން އޮތީ މިމުބާރާތުގެ ޗެންޕިއަންކަން ހޯދައިގެންނެވެ. މިސީޒަނުގައި ޔޫރަޕުގެ މުބާރާތް ތަކުން އެއްވެސް ބައްޔެއް ނުވެ އޮތް ހަމައެކަނި ޓީމަކީވެސް މެންޗެސްޓަރ ޔުނައިޓެޑްއެވެ. އެހެންކަމުން މިއީ ޔުނައިޓެޑުގެ ކުޅުންތެރިންނާއި ސަޕޯޓަރުންނަށް ލިބޭނެ ވަރަށް ބޮޑު ހިތްހަމަޖެހުމެކެވެ.