ނިރުބަވެރި ޔަހޫދީ ދައުލަތް އިޒްރޭލުން ޣައްޒާގައި ހިންގަމުންދާ އަނިޔާވެރި ޙަމަލާތަކާއި ދެކޮޅަށް ދުނިޔޭގެ އެކި ޤައުމުތަކުން އަޑުއުފުލަން ފަށައިފިއެވެ.

އަޔަލެންޑް، އޮސްޓްރިއާ ފަދަ ޤައުމުތަކުން އިޒްރޭލުން 60 ދުވަހަށްވުރެ ގިނަ ދުވަހު ޣައްޒާއަށް އަޅާފައިވާ ބްލޮކޭޑް ކުށްވެރިކޮށްފައިވާއިރު، އެމްނެސްޓީ އިންޓަނޭޝަނަލްއިން މި ޢަމަލުތައް ހަނގުރާމައިގެ ޖަރިމާތަކެއްގެ ގޮތުގައި ސިފަކޮށްފައިވެއެވެ.

ޣައްޒާގެ އިންސާނީ އެހީގެ ކޯޑިނޭޓަރު އަމްޖަދު ޝަވާ ވިދާޅުވެފައިވަނީ އިޒްރޭލުގެ ހަނގުރާމައިގެ ސަބަބުން "މުޅި ޣައްޒާ ބަނޑުހައިހޫނުކަމުގައި" ވަނިކޮށް، ކުޑަކުދިން ކެއުމުގެ މަދުކަމުގެ ސަބަބުން މަރުވުމުގެ ނުރައްކާ އިތުރުވެފައިވާ ކަމަށެވެ.

މެޑިކަލް މަސްދަރުތަކުން ބުނާ ގޮތުގައި މިއަދު އެކަނި ވެސް އިޒްރޭލުގެ ޙަމަލާތަކުގައި މަދުވެގެން 35 މީހުން މަރުވެފައިވެއެވެ. މީގެ ތެރެއިން އެއް ޢާއިލާއެއްގެ 9 މެންބަރުން މަރުވެފައިވެއެވެ.

ޣައްޒާގެ ޞިއްޙީ ވުޒާރާއިން ހާމަކޮށްފައިވާ ގޮތުގައި އިޒްރޭލުގެ ހަނގުރާމައިގައި މަދުވެގެން61,700 ފަލަސްޠީނުން މަރުވެފައިވާއިރު، 118,091 މީހުންނަށް އަނިޔާވެފައިވެއެވެ. އަދި ވެއްޓިފައިވާ އިމާރާތްތަކުގެ ދަށުގައި ހާސްތަކެއްގެ މީހުން މަރުވެފައިވާނެ ކަމަށް އެ ވުޒާރާއިން ލަފާކުރެއެވެ.